CNA ka zbuluar detaje të reja nga dosja hetimore e SPAK-ut, e zbardhur nga gjykata, që lidhen me OJF-të të drejtuara nga Ajola Xoxa dhe bashkëpunimin e tyre me Elman Abulen dhe institucione të tjera.
Një prej detajeve tregon se Teatri Kombëtar i Operës dhe Baletit ka paguar qira për shërbimet e OJF-së “Rametal”, për kostumografi dhe skenografi të realizuara nga Drejtoria e Baletit të këtij teatri. Kontrata e qirasë është nënshkruar më 20.09.2023, me palë përfaqësuese Teatrin Kombëtar dhe OJF-në “Rametal”.
Sipas kontratës, TKOBAP do t’i paguajë “Rametal” një shumë prej 1,213,380 lekësh pa TVSH.
Por kjo nuk është e gjitha, pasi “Rametal” gjithashtu ka ofruar me qira shërbime për TKOB për shfaqjen e baletit “SONOMA”, për të cilën është paguar një shumë tjetër prej 1,868,220 lekësh pa TVSH. Tarifat e paguara për këto shërbime do të shkojnë në favor të “Rametal”, me përfaqësues Elman Abulen.
Në këtë skemë financiare, fondet publike të Ministrisë së Kulturës kalojnë në dy OJF që janë nën kontrollin e Ajola Xoxës.
Më pas, këto fonde shkojnë te “Arts Lab”, në pronësi të dajës së Ajola Xoxës, dhe përfundojnë në duar të familjarëve të saj, si Valmir Xoxa dhe Ergys Krisiko.
Gjithashtu, është e provuar se pas arkëtimit të pagesave për qiradhënien, paratë kalojnë përmes “Partners Law”, një shoqëri në pronësi të Ajola Xoxës.
Gjykata ka analizuar dhe shpjeguar se kjo skemë tregon një bashkëpunim të ngushtë midis Teatrit Kombëtar të Operës dhe Baletit dhe OJF-ve të drejtuara nga Ajola Xoxa, me pjesëmarrjen e Elman Abules përmes “Rametal” për kostumografi dhe skenografi, duke përdorur fonde publike për projekte private./ CNA
