Jo pak situata të tilla kanë ndodhur së fundmi në vendin tonë, ku për të favorizuar një palë falsifikohen ose tjetërsohen vendet që janë pikasur. Ndoshta në këtë fjali nuk e kuptoni për çfarë bëhet fjalë, por kemi një rast konkret.
Emisioni “Stop” ashtu edhe si herë të tjera ka bërë publike një ankesë të drejtë të banorëve të Kamzës të cilët jetojnë në Laknas, në zonën e quajtur ndryshe, Plepat e Brukes. Këta banorë janë ngritur dhe po çojnë zërin pikërisht për arsyen sepse Bashkia e Kamzës ka tjetërsuar një truall të tyre, të cilin e kanë prej 300 vjetësh, për t’ia dhënë atë me qira një shoqërie që dëshiron të ndërtojë stalla bagëtish.
Konkretisht banorët tregojnë se që të të jepet kjo leje toka duhet të rezultonte si gjithçka tjetër, përveçse si pyll, ndaj dhe e kanë tjetërsuar dhe e kanë regjistruar si zallishte. Ata janë mbledhur dhe kanë bërë një peticion me kërkesa zyrtare, mirëpo nuk kanë marrë asnjë përgjigje nga kjo bashki dhe as nga portalet zyrtare që qeveria ka vendosur në dispozicion, të tilla si ai i bashkëqeverisjes, kështu që kanë vendosur që ta bëjnë publike ngjarjen. E pyetur nga gazetarja e emisionit, specialistja në zyrën e Kadastrës së Kamzës, Fatmira Tane, ka thënë se sipërfaqja në fjalë sipas dokumenteve, rezulton zall dhe jo pyll, mirëpo askush nuk është përpjekur që ta vërtetojë realisht se çfarë trualli është.
Megjithatë pas publikimit të rastit pritet që minimalisht instancat kryesore që e kanë në dorë këtë çështje të përgjigjen dhe të marrin përsipër përgjegjësitë.
Nga video e mëposhtme do dëgjoni thirrje të ndryshme, por ato që bëjnë më shumë përshtypje janë këto fjalë që kanë thënë dy fëmijë:
“S’duam të na prishet pylli se këtu janë rritur prindërit tanë”
“O Xhelal, do luajmë me derrat futboll?”
