Emiljano Shullazi ka lënë qelinë e tij në burgun 313 për t’iu nënshtruar një vizite shëndetësore në ambientet e QSUT. Shullazi është dërguar në QSUT nën masa të rrepta sigurie nga ana e policisë. Nuk dihen arsyet e kësaj vizite shëndetësore apo problemet që paraqet.
Edhe më 27 gusht 2019, Emiljano Shullazi, shkoi në spital, për shkak të problemeve me shëndetin. Ai u shtrua në një spital privat. Transportimi nga Burgu 313 u krye me masa të forta sigurie.
Prej muajsh Shullazi është i izoluar në regjimin ‘41 biss’ ose ndryshe burgu i egër. Kujtojmë se pak ditë më parë në spitalin e Burgut u dërgua edhe Dritan Dajti.
Drejtoria e Përgjithshme e Burgjeve ka ndërmarrë masa të ashpra,si për Shullazin, ashtu edhe për persona të tjerë të dënuar, që ata të mos favorizohen në institucionet e kryerjes së dënimeve penale.
Madje, drejtoi i përgjithshëm i burgjeve shkarkoi nga detyra dhe bëri kallëzim penal në prokurori për akuzën e “Shpërdorimit të detyrës”, ndaj drejtorit Maksim Hamiti të Burgut 313, sepse ky i fundit e favorizonte Shullaizn për t’u takuar me shokët e tij.
Grupi i Shullazit është dënuar me 55 vite burg në total nga Gjykata e Shkallës së Parë të Krimeve të Rënda por vendimi u apelua. Emiljano Shullazi u shpall faktor për gjobëvënien ndaj biznesmenit Ylvi Beqja dhe Jani Zako, por shpëtoi nga akuzat për shkatërrim të pronës me eksploziv për dy raste dhe kanosjes së dy profesorëve Mynyr Koni dhe Dhori Kule. /Gazetareforma.com/
