Ashtu si kishte njoftuar edhe më parë, presidenti, Ilir Meta, ishte i pranishëm ditën e sotme në Komisionin Hetimor.
Presidenti kishte marrë me vete edhe një fotografi të vjetër, të 30 viteve më parë, ku ai i kërkonte Ramiz Alisë, mbajtjen e zgjedhjeve të lira.
Ai e argumentoi këtë veprim, duke thënë se është e tepërt t’i kërkosh një student të dhjetorit, mbajtjen e zgjedhjeve me vetëm një kandidat, shkruan “Faxnews”.
“Është e tepërt që ti kërkosh një studenti të dhjetorit që të krijosh precedent të ri, të zgjedhjeve pa kandidat”, u shpreh Meta.
Ndërkohë pyetjes së deputetes socialiste, Vasilika Hysi, në lidhje me vendimin për ç’dekretimin e 30 qershorit si datë zgjedhjesh, Meta iu përgjigj duke thënë se e ka bërë në bazë të praktikës së presidencës.
Më tej presidenti shtoi, se nuk mund të pristë që të ndodhte ndonjë gjakderdhje dhe se duhej më shumë kohë në dispozicion, që dhe opozita të paraqitej me kandidatët e saj.
Ndër të tjera, Meta sqaroi edhe akuzat e deputetit socialist, Bashkim Finos ndaj tijj.
Ky i fundit kishte thënë se në një nga dekretet, presidenti e kishte pasur personale me të.
Meta iu përgjigj duke thënë, se nuk ka asnjë shqetësim personal me të, ndërsa e ka ftuar edhe për kafe në Presidencë.
Ndërkohë gjatë seancës, kreu i Komisionit Hetimor, Ulsi Manja, i kërkoi Metës që të gjente një dëshmitarë, i cili mund të provojë se presidenti i shtyu zgjedhjet, pasi kishte marrë informacione sekrete se do të digjej Kuvendi i Shqipërisë.
Meta i tha nga ana tjetër se nuk ishte e nevojshme të kishte dëshmitarë, pasi veprimet e tij kanë qenë publike, ndërsa shton se është përpjekur që t’ja komunikojë shtyrjen e zgjedhjeve kreut të Kuvendit, Gramoz Ruçit, por ky i fundit kishte një angazhim në Tepelenë.
