Është shtyrë seanca gjyqësore në GJKKO ndaj kryebashkiakut të Tiranës, Erion Veliaj, mes debateve procedurale dhe mungesave të shumta të të pandehurve dhe përfaqësuesve të tyre ligjorë.
Në seancë nuk janë paraqitur Meriman Palushi dhe Sokol Kryeziu, të cilët janë përfaqësuar vetëm nga avokatët e tyre. Ndërsa kompania “Gerard A sh.p.k.” është përfaqësuar nga administratorët ligjorë, për shoqërinë “Fusha sh.p.k.” ka qenë i pranishëm avokati Uljan Bajrami.
Mungesa janë regjistruar edhe nga Meriton Lika dhe mbrojtja e tij, si dhe nga kompania “Lan sh.p.k.”. Avokatët Maks Haxhia dhe Dritan Jahaj nuk kanë qenë të pranishëm, ndërsa për Haxhinë është bërë me dije se ndodhej jashtë shtetit për arsye zyrtare.
Po ashtu, mungesa pati edhe nga përfaqësues të organizatave të shoqërisë civile “Qendra Harabel”, “Byl-A” dhe “Qendra Muza”, të cilat ose nuk kishin përfaqësues në sallë, ose u ndoqën vetëm nga avokatët.
I vetmi që u paraqit personalisht në sallë ishte Valmir Xoxa, për të cilin u raportua edhe ndryshim në ekipin mbrojtës, pas revokimit të njërit prej avokatëve dhe caktimit të një përfaqësuesi të ri ligjor.
Gjatë seancës, SPAK kërkoi pezullimin e afateve të paraburgimit, duke argumentuar se mungesat e vazhdueshme të mbrojtjes po sjellin vonesa në proces. Kërkesa u kundërshtua nga mbrojtja e Veliajt, e cila deklaroi se kryebashkiaku nuk është shkak i shtyrjeve dhe se nuk ekzistojnë arsye ligjore për pezullimin e afateve.
SPAK ka përfunduar hetimet dhe ka dërguar për gjykim dosjen ndaj Veliajt, ku rëndojnë 13 akuza ndaj tij dhe 12 akuza ndaj bashkëshortes së tij, Ajola Xoxa.
Sipas hetimeve, Veliaj dhe Xoxa dyshohet se, në 9 episode të ndryshme, kanë përfituar shuma monetare dhe pasuri të paluajtshme nga subjekte tregtare dhe organizata jofitimprurëse, të cilat më pas kanë marrë leje ndërtimi apo fonde publike nga Bashkia e Tiranës.
Hetimet pretendojnë se Veliaj, në cilësinë e kryebashkiakut, ka miratuar shpërndarjen e fondeve që më pas kanë përfunduar tek OJF-të e kontrolluara nga Ajola Xoxa dhe persona të afërt me të. Gjithashtu, sipas SPAK, çifti ka përfituar pasuri të konsiderueshme nga kompani që kanë marrë fonde publike dhe leje ndërtimi nga Bashkia Tiranë.
Sipas organit të akuzës, këto veprime përbëjnë elementë të veprës penale të korrupsionit pasiv dhe aktiv, të parashikuara nga nenet 260 dhe 245 të Kodit Penal.
