Dërgesa me 15 mijë e 210 doza të vaksinës Pfizer nuk do të vijë në Shqipëri ditën e sotme. Lajmin e ka dhënë Ministria e Shëndetësisë dhe Mbrojtjes Sociale, e cila ka bërë të ditur se dërgesa është shtyrë për ditën e martë. Ministria ka thënë në një njoftim për shtyp se ka qenë kompania ajo që ka njoftuar për vonesën me 24 orë. Deri tani në Shqipëri kanë mbërritur 17 355 doza të vaksinës Pfizer që janë të mjaftueshme për të vaksinuar gjysmën e po aq njerëzve, duke qenë se vaksina injektohet në dy doza.
Njoftimi i MSH:
“Ministria e Shëndetësisë dhe Mbrojtes Sociale informon se 15,210 dozat e vaksinave të kompanisë Pfizer do të mbërrijnë ditën e martë në Shqipëri. Sapo kemi marrë njoftim nga kompania dhe autoriteti përgjegjës për transportin e sigurt të vaksinës, se sasia e vaksinave Pfizer, e konfirmuar për të mbërritur mbrëmjen e sotme, shtyhet me 24 orë.
Ministria e Shëndetësisë dhe Mbrojtjes Sociale do t’ju mbajë të informuar për çdo zhvillim lidhur me mbërritjen e vaksinave në vendin tonë ndërkohë që informon qytetarët se procesi i vaksinimeve po vijon sipas planit ne qendrat e vaksinimit te përqëndruar, me vaksinimin e personelit shëndetësor dhe grupmoshën +80 vjeç, sipas fashave të përcaktuara”, thuhet në njoftim
