Republika e Shqipërisë duket se është kthyer në republikën e mesazheve dhe qokave, ku ligjet dhe rregullat vlejnë vetëm për ata që nuk kanë “mik”. Shembulli i fundit është rasti i futbollistit të Kosovës, Edon Zhegrova, i cili mori nënshtetësinë shqiptare jo nëpërmjet procedurave të ligjit, por pas një komunikimi privat në WhatsApp me kryeministrin Edi Rama.
Nga biseda e publikuar vetë prej Zhegrovës, shihet se pasi ai i kërkoi Ramës shtetësinë, kryeministri jo vetëm ia premtoi, por edhe u kujdes personalisht t’i dërgojë dekretin e firmosur nga Presidenti Bajram Begaj. Për “nderin” që iu bë, futbollisti e falënderoi publikisht Ramën, duke ekspozuar kështu hapur mënyrën sesi funksionon ky shtet: jo me institucione, por me ndërhyrje personale.
Ky rast është një bastardim i plotë i ligjit, një tjetër provë se Shqipëria nuk është një vend i së drejtës, por një vend i qokave dhe i favoreve. Zhegrova ta gëzojë nënshtetësinë, por ndërkohë qindra qytetarë, mes tyre të huaj të integruar prej vitesh në Shqipëri, familje të tëra që kanë kontribuar në jetën ekonomike e sociale të vendit, presin me vite nëpër zyrat e administratës dhe zvarriten në burokraci pa marrë dot një përgjigje. Epo një mesazh i vetëm në telefonin e kryeministrit mjafton që shtetësia të sigurohet brenda pak ditësh.
Kjo është fyese edhe për futbollistë të tjerë që luajnë në kampionatin shqiptar, për profesionistë, intelektualë e punëtorë që i kanë sjellë vlera të padiskutueshme vendit, por nuk arrijnë dot të përfitojnë këtë të drejtë themelore.
Sipas cilit ligj Rama ka të drejtë të japë shtetësinë shqiptare me mesazh privat? Përdorimi i një të drejte të tillë si instrument për interesa e për ndere personale është tregues i qartë i një sistemi të kalbur, ku vendimet nuk merren në bazë të ligjit, por sipas humorit dhe interesit të pushtetarëve.
Pra, mesazhi që u dha është i qartë: në Shqipëri nuk ka kuptim të respektosh procedurat. Një pasaportë që duhet të ishte e drejtë për të gjithë, mbetet privilegj vetëm për ata që kanë numrin e duhur në WhatsApp.
