Një grua dhe vajza e saj 10-vjeçare kanë përjetuar momente terrori natën e ndërrimit të viteve, kur ish-bashkëshorti i saj, një 45-vjeçar me origjinë shqiptare, hyri ilegalisht në Greqi dhe tentoi të depërtojë në banesën e tyre duke thyer xhamat.
Sipas ish-bashkëshortes, ai kishte konsumuar një sasi të madhe alkooli dhe me veprimet e tij kishte tmerruar vajzën.
Pasi nuk arriti të hynte në shtëpi, ai shkaktoi dëme materiale duke përplasur dy makina të parkuara pranë banesës.
Autoritetet policore arritën ta ndalojnë, por ai rezistoi gjatë arrestimit dhe refuzoi të kryente testin e alkoolit.
Në seancën gjyqësore të mbajtur një ditë më parë, 45-vjeçari kërkoi falje dhe pranoi se kishte konsumuar alkool përpara incidentit.
Ai rrëfeu se kishte hyrë ilegalisht në Greqi në këmbë, rreth 20 ditë më parë, dhe se shkaku i veprimeve të tij ishte dëshira për të festuar ditëlindjen e vajzës së tij, megjithëse ish-bashkëshortja nuk e kishte lejuar.
Gjykata e shpalli fajtor për hyrje të paligjshme në vend, dhunë në familje, sulm ndaj policisë dhe refuzim të testit të alkoolit.
Ai u dënua me 18 muaj burg, një gjobë prej 3700 eurosh dhe heqjen e lejes së drejtimit për dy muaj.
