Kryedemokrati Lulzim Basha ka thënë se kryeministri Rama ka zgjedhur luftën personale para interesit të njerëzve, ndërsa e krahasoi Shqipërinë me Zambian, që sipas raporteve renditet e para në botë për ryshfet. Ai tha se këto nuk janë thjesht kauza normale të opozitës, por plagë për qytetarët që luftojnë për bukën e gojës.
“Janë miliona euro që dalin nga xhepat e qytetarëve. Përpara interesit të njerëzve Edi Rama ka zgjedhur luftën personale. Përpara interesit të njerëzve ka vendosur babëzinë e tij. Vetëm ryshfeti ndaj këtij shteti nga niveli më i ulët dhe niveli më i lartë u kushton shqiptarëve 500 milionë euro në vit. Raporti ndërkombëtar na rëndit në botë të dytin pas Zambias Afrikane. Pas kësaj vjen Shqipëria e Ramës, për ryshfet. Kjo shifër është 3 herë më e lartë nga sa ishte në vitin 2013, kur morën pushtetin. Këto edhe shumë plagë të tjera nuk janë thjesht kauza normale të opozitës por janë plagë për qytetarët që rropatën për të nxjerrë bukën e gojës. Plagë për të rinjtë dhe të rejat që nuk gjejnë dot punë, sepse këto thagma të krijuara nga kjo pakicë e korruptuar e bëjnë të pamundur të krijojnë vende pune”, tha kreu i PD.
Basha tha se çdokush që ka dëgjuar dhe posedon zgjuarsinë e shqiptarit nuk mund të gënjehet, pasi kjo nuk është krizë energjetike, por krizë korrupsioni.
“Çdokush që ka dëgjuar që posedon zgjuarsinë e shqiptarit nuk mund të gënjehet, kjo nuk është krizë energjetike, po kriza e korrupsionit e babëzisë dhe e keqmenaxhimit të kësaj qeverie”, u shpreh Basha.
