Në emisionin “Vetting” në News24, u trajtua sot situata e rindërtimit në Bashkinë e Vorës, një nga zonat më të prekura nga tërmeti shkatërrimtar i 26 nëntorit 2019.
Qeveria kishte premtuar se banorët që humbën shtëpitë e tyre nga tërmeti do të përfitonin bonus qiraje, por tashmë kanë kaluar 5 vjet dhe ata nuk e kanë marrë këtë mbështetje.
Në këto kushte, ata që ende kërkojnë të qëndrojnë në banesa me qira, janë të detyruar të përballojnë vetë kostot, ndërsa disa të tjerë që nuk kanë mundësi financiare janë strehuar në kasolle apo kontejnerë
Pas tërmetit, familjet që humbën shtëpitë e tyre vazhdojnë të jetojnë pa banesa, pa mundësi ekonomike dhe pa mbështetje, pasi bonuset e qirave janë ndërprerë. Ata po përballen me kushte të vështira, duke mbetur në kufijtë e mbijetesës.
“Nuk kishim mundësi të paguanim qiranë dhe përfunduam në kontejner.
As një thes me miell për familje nuk na kanë sjellë, por dy shtëpi një thes. Një kasolle me dërrasa të na bëjnë”, shprehen banorë të Vorës, ndërsa luten që të kenë një banesë për të jetuar të lumtur vitet e jetës që u kanë mbetur.
Që prej momentit kur panë të shembej përpara syve gjithçka që kishin ndërtuar me mund, ata janë bllokuar në një kalvar dhimbjeje, pa mundur të rikuperojnë asgjë.
Në një kontejner të ftohtë jetojnë katër të moshuar: Bedrie Breti dhe bashkëshorti i saj, si dhe Naxhire Disha me burrin e saj. Ata ishin komshinj para se pallati ku jetonin të shkatërrohej. Prej pesë vitesh, ata jetojnë të detyruar si një familje e vetme, duke kaluar pesë dimra të tërë në kushte të vështira. Ata nuk kanë më shpresa se mund të kenë një shtëpi të re, edhe pse do ta kalojnë edhe këtë dimër në kushte të ngjashme.
“S’jemi duke jetuar 500 vjet. Në kontejner jetojmë bashkë 2 familje, ishim komshi të dy atje, kemi ardhur këtu jemi bërë vëlla e motër “, shprehet banorja , që dikur banonte në një pallat që është shembur.
Ajo nuk kishte mundësi të paguante qiranë, dhe bashkë me komshiun, përfunduan në kontejner.
“Kemi nxjerrë rreckat e këto dyshekët jashtë sepse na i ka lagur shiu, ka rënë shi i madh dy net më parë.
Unë fle këtu, burri atje. Nuk kam fuqi të hipi atje lart te krevati. Jemi si në kotec të pulave.
Vendi ku kemi vendosur kontejnerin nuk është i joni, na i ka dhënë një koshmi për sevap sepse na shikonte katër pleq të vjetër.
Ai na i dha për 6 muaj deri në 1 vit. Kanë kaluar 5 vite dhe na ka kërkuar që të dalim që këtu sepse do të bëjë punimet e veta, nuk e di.
E ka pronën e vetë. Presim të ndërtohet pallati, ashtu na thanë atëhere do të bëhet shpejt, do të bëhet shpejt”, shprehet banorja.
