Deputeti i opozitës, Ralf Gjoni në fjalën e tij të mbajtur në Kuvend, ka folur për shpalljen “non-grata”, të disa zyrtarëve Bullgarë dhe ish-kryeministrin Sali Berisha. Ai ka thënë nga foltorja e Kuvendit se nuk është vetëm Berisha, që u shpall “non-grata” por se do të ketë edhe të tjerë duke nënkuptuar kështu që e ka radhën edhe Presidenti Meta.
Gjoni u bëri thirrje amerikanëve që përveç se shpalljes non-grata t’u sekuestrohet edhe pasuria këtyre politikanëve.
“Shpallja non-grata e bullgarëve që bullgarizuan shqiptarët është një shuplake për partnerët e Bashkimit Evropian. Shpalljet non-grata në Shqipëri duhet tu hetohet edhe pasuria, pasi kam dëgjuar se Uashingtoni ka një listë të madhe përveç Berishës”, u shpreh Gjoni.
Deputeti i opozitës u shpreh se duhet t’u hetohet pasuria e edhe pasuria e oligarkëve. “Duhet të hetohen oligarkët e politikës dhe medias të cilët janë shndërruar në ndërtues. Një pyetje kisha për miqtë tanë a ka në plan Uashingtoni ta ndjek këta që shpallen non-grata tu sekuestrohet pasuria. Administrata Biden po merret seriozisht me korrupsionin, ka ardhur koha të marrë fund pandëshkueshmeria. Këmbanat e qyqes po kumbojnë fort dhe unë i falenderoj amerikanët që po merren me pastrimin e pisllëkut që ka kapur këto vende,” tha Gjoni.
