Prokuroria e Posaçme ka ngritur zyrtarisht akuzë ndaj kryetarit të Komisionit të Prokurimit Publik, Jonaid Myzyri, duke e shpallur atë të pandehur për “shkelje të barazisë në tendera”, në bashkëpunim.
SPAK bën me dije se procedimi penal lidhet me tenderin e mirëmbajtjes së segmentit rrugor Shpal–Ura e Repsit, me gjatësi 58.7 kilometra dhe vlerë 2.2 milionë euro, zhvilluar në vitin 2020 nga Autoriteti Rrugor Shqiptar.
Gjykata e Posaçme kundër Korrupsionit dhe Krimit të Organizuar ka vendosur të pezullojë Myzyrin nga detyra, duke e detyruar të paraqitet periodikisht në policinë gjyqësore.
Vendimi është marrë në kuadër të dosjes penale nr. 175/1 të vitit 2022, ndërsa ndaj tij është komunikuar edhe zyrtarisht akuza.
Sipas SPAK, gjatë shqyrtimit të një ankese mbi këtë tender, Komisioni i Prokurimit Publik ka favorizuar në mënyrë të paligjshme bashkimin e dy operatorëve ekonomikë, të cilët më pas rezultuan se kishin paraqitur dokumente të falsifikuara.
Sipas aktit të ekspertimit, paligjshmëritë e konstatuara nga autoriteti kontraktor nuk janë marrë parasysh nga Komisioni.
Për këtë çështje janë marrë të pandehur edhe dhjetë persona të tjerë: V.Zh., L.S., M.Z., E.B., V.H., G.A., A.H., të akuzuar për të njëjtën vepër penale si Myzyri, si dhe M.L., N.K. dhe A.K., të akuzuar për falsifikim dokumentesh sipas nenit 190 të Kodit Penal.
Hetimet po drejtohen nga prokurori Elvin Gogaj, i cili ka vendosur të ndryshojë statusin e Jonaid Myzyrit nga person nën hetim në të pandehur.
Edhe këtë herë, Myzyri ka zgjedhur të mos bëjë asnjë koment për mediat pas paraqitjes në ambientet e SPAK.
