Në dhjetor të 2018 Adnan Kosova kaloi me sukses sitën e “Vettingut” sipas kritereve të rivlerësimit, mirëpo, “ngeci” para Kolegjit të Posaçëm të Apelimit (KPA), i cili vendosi sot shkarkimin nga detyra të prokurorit të Prokurorisë së Përgjithshme.
Vendimi u mor nga komisioni i përbërë nga Sokol Çomo kryesues, Ina Rama relator, Ardian Hajdari, Natasha Mulaj, Rezarta Schuetz anetare.
Më herët Institucioni i Komisionit Publik kishte ankimuar vendimin e KPK, por Kosova jo vetëm që nuk arrinte të justifikonte pasurinë e tij, por dyshohet se ka lidhje me persona me të shkuar kriminale.
Ish-prokurori nuk ka justifikuar një shumë parash për blerjen e apartamentit në Tiranë, ka shmangur tatimin prej 1 mln 500 lekë dhe për të ardhurat 2.5 mln lekë për shitjen e një apartamenti në Korçë.
“Trupi gjykues i Kolegjit të Posaçëm të Apelimit, i përbërë nga Sokol Çomo kryesues, Ina Rama relator, Ardian Hajdari, Natasha Mulaj, Rezarta Schuetz anëtarë, shpalli sot vendimin për çështjen që i përket ankimit të paraqitur nga Komisioneri Publik, kundër vendimit nr. 90, datë 20.12.2018, të Komisionit të Pavarur të Kualifikimit që lidhet me procesin e rivlerësimit kalimtar të subjektit të rivlerësimit Adnand Kosova. Në përfundim të gjykimit, bazuar në nenin 66, pika 1, germa “b” e ligjit nr. 84/2016 “Për rivlerësimin kalimtar të gjyqtarëve e prokurorëve në Republikën e Shqipërisë”, trupi gjykues, me shumicë votash, vendosi: Ndryshimin e vendimit nr. 90 datë 20.12.2018, të Komisionit të Pavarur të Kualifikimit dhe shkarkimin nga detyra të subjektit të rivlerësimit Adnand Kosova“, njoftoi KPA.
Adnand Kosova ka drejtuar ish-Prokurorinë e Krimeve të Rënda në vitet 2004-2008 dhe më pas është emëruar në Prokurorinë e Përgjithshme, ku së fundi ishte dhe në sektorin e dekriminalizimit.
