Luke Shaw ka qenë një nga lojtarët e Anglisë që shkëlqeu me paraqitjen e tij në Kampionatin Europian duke u bërë një mur në mbrojtjen e “Tre luanëve”. Ai ishte një pikë kyçe në skemën e Gareth Southgate, pavarësisht se e filloi si zëvendësues në ndeshjen hapëse kundër Kroacisë. Ndër të tjera, ai ishte edhe shënuesi i golit të avantazhit për Anglinë në finalen e Wembley, pavarësisht se skuadra e tij humbi me penallti përballë Italisë.
Por sakrifica e yllit të Manchester United ka qenë më e madhe nga ç’mund të ishte menduar. Gazeta britanike The Telegraph ka bërë me dije se mbrojtësi i luajti tre ndeshjet e fundit të Kampionatit Europian me disa brinjë të thyera. Dëmtimi i Shaw erdhi në ndeshjen e raundit të 1/16-ave ndaj Gjermanisë dhe futbollistit iu desh të luante me dhimbje në çerekfinalen ndaj Ukrainës, gjysmëfinalen ndaj Danimarkës dhe në finalen e madhe.
Në Manchester United ka një shqetësim në rritje për gjendjen fizike të mbrojtësit, i cili aktualisht po shijon pushimet e tij në Greqi me disa shokë të ekipit nga skuadra angleze si Declan Rice ose Mason Mount. Lojtari do të testohet kur të bashkohet me para-sezonin e Djajve të Kuq dhe prania e tij në nisjen e Premier League është ende në dyshim.
