Pas miratimit të ligjit ‘Anti-KÇK’ më 31 janar, ditën e sotme Kuvendi ka votuar këtë paketë me 89 vota ‘Pro’.
Pas miratimit, kryeministri Edi Rama teksa fliste për KÇK-në foli edhe për lidhjet e politikës me krimin dhe tha se mezi pret që të dalë përballë OFL për të treguar se nuk është i përzierë me zullumin dhe se shumë shpejt OFL-ja do merret edhe me politikanët.
“Ju mos u shqetësoni fare, se që do vijë dita do vijë, është më afër se ç’duket, për të gjithë ne këtu, unë i pari, për të gjithë ne këtu, por edhe ata që janë jashtë, do vijë dita që do duhet të provojmë që nuk vijnë nga zullumi. Unë mezi e pres atë ditë, se ndryshe nga ç’flitet këtu”.
Së fundmi, ish-kryeministri Sali Berisha ka dhënë një intervistë për Euronews Albania, ku i ka ‘paraprirë’ deklaratës së Ramës, pasi ka folur rreth pronave që zotëron.
Berisha thotë se ka në pronësi vetëm 125 metra katrorë apartament, ndërsa i pyetur për akuzat se është pronar i një vile në Gjirin e Lalzit, Berisha tha se vila është në pronësi të dhëndrit dhe kunatit të tij.
Më tej, ish-kryeministri tha se dhe ai do të kishte dëshirë të ishte pronar i një vile, por thotë se do i duhej të merrte kredi për ta ndërtuar.
“Të di një gjë çdo shqiptar, përveç se 125 metër katror apartament, nuk ka asnjë metër katror në tokë. Nëse më sheh në një ndërtesë apo një tjetër dhe thua është e imja. Po të kisha dashur unë, dhe absolutisht nuk është se s’dua vila, do kisha ndërtuar vilën më të bukur por do më duhej të merrja kredi, por nuk shkon kjo si kryetar i qeverisë apo opozitës. Ajo vilë është kryekëput, gjysma e dhëndërit dhe gjysma e kunatit, kunati im është biznesmen”, u shpreh Berisha.
Ndër të tjera, gjatë intervistës, ish-kryeministri Sali Berisha ka lëshuar akuza të forta ndaj institucioneve të Vettingut në Shqipëri, pasi sipas tij në procesin e Vettingut paguhen 300 mijë euro për të pastruar figurën.
Ai lëshoi akuza të rënda edhe ndaj Drejtorisë së Informacionit të Klasifikuar, duke thënë se nxjerrin vetëm ato të dhëna që dëshirojnë.
“Korrupsioni në vetting shkon në 300 mijë euro, për t’u pastruar. DSIK-ja jep ato që do dhe ato që s’do. Dhe ato që i shohin kanë lidhje me krimin”, tha ndër të tjera Berisha.
Ndërsa sa i përket çështjes së nxehtë ‘Mezhgorani’, ku mes të cilëve u arrestua Henri Çili, Berisha tha për këtë të fundit se është arrestuar me urdhër të kryeministrit Edi Rama.
Sipas Berishës, zyrtari i lartë që është takuar me Çilin mund të jetë Ardian Dvorani, Sokol Sadushi, Artur Metani ose Naureda Llagami.
“Absolutisht çdo strukturë që ngrihet në kundërshtim me Kushtetutën, dhe këto aq sa funksionojnë, gjithnjë e më keq do funksionojnë. Sepse rasti i fundit, afera Çili tregoi që një “Katicë”, është 1 milion mbrapa. Këtu unë kam shkresën e prokurorit, dhe unë i besoj asaj që thotë prokurori. Ai thotë që është zhvilluar një takim i Çilir me një drejtues të lartë të Drejtëisë, kush janë këta, Dvorani, Metani, Sadushi dhe Llagami. Që Henri Çili u arrestua me urdhër të Edi Ramës s’ka dyshim ajo punë. Sepse doli ministri dhe e përshëndeti, doli gjeneral hashashi. Pra ditën e parë e përshëndetën, nxorri si zëdhënës Ardi Veliun. Shërbimet inteligjente të policisë kanë bërë 56 relacione ndaj tij për trafik njerëzish dhe droge.”
