Deputetja e opozitës paralamentare Rudina Hajdari ka deklaruar se mbi 75% e shqiptarëve e mbështesin dhe duan hapjen e listave. Me anë të një statusi në Facebook, Hajdari thekson se dje i kanë bërë të qartë kryeministrit Edi Rama se hapja e listave është një kusht i panegociueshëm për miratimin e Reformës Zgjedhore dhe marrëveshjes Rama-Basha.
“Dje i bëmë të qartë Edi Ramës se hapja e listave është një kusht i panegociueshëm për miratimin e reformës zgjedhore dhe marrveshjes Rama-Basha. Sot, mbi 75% e shqiptarëve e mbështesin dhe duan hapjen e listave si një mjet për të patur më shumë fuqi mbi vendimarrjen në Parlament. Misioni ynë është që në parlament të përfaqësojmë këtë shumicë dërrmuese shqiptarësh e jo dëshirat e 2 apo 3 kryetarëve që kanë frikë nga populli.”, shkruan Hajdari.
Kujtojmë se mbrëmjen e djeshme deputetët e opozitës në Kuvend zhvilluan një takim me kryeministrin Rama. Kreu i qeverisë paralajmëroi se mund të mos ketë koalicione parazgjedhore.
Pas takimit me kryeministrin Edi Rama Hajdari në një deklaratë për mediat tha se listat e hapura janë të dobishme. Ajo u shpreh me vendosmëri se nuk do të ketë asnjë tërheqje për qëndrimet e saj. Gjithashtu deputetja theksoi se kryeministri Edi Rama duhet të vendosë nëse do të mbështesë apo jo shqiptarët.
Hajdari ka bërë me dije se as në këtë takim të dytë nuk ka vendimmarrje lidhur me vazhdimësinë e Reformës Zgjedhore dhe miratimin në Kuvend.