Sistemi shëndetësor shqiptar po përballet me sfida serioze, ku helmimet nga ushqimi dhe infeksionet bakteriale janë në rritje të ndjeshme, ndërkohë që institucionet përgjegjëse vijojnë të heshtin.
Të dhënat e publikuara nga Instituti i Shëndetit Publik tregojnë për një situatë shqetësuese: mbi 98% e rasteve të raportuara në pesë muajt e parë të vitit 2025 mbeten pa një shkak të identifikuar, duke pamundësuar marrjen e masave parandaluese.
Vetëm gjatë kësaj periudhe janë shënuar 466 raste të helmimeve ushqimore, me një kulm prej 115 rastesh në muajin maj. Rastet lidhen kryesisht me përpunimin dhe ruajtjen e pasigurt të produkteve ushqimore dhe mungesën e standardeve higjienike në ambientet e gatimit.
Po ashtu, infeksionet nga salmonela janë rritur nga 3 raste në janar në 31 raste në maj, për një total prej 59 rastesh.
Megjithatë, shqetësues mbetet fakti që në mbi 98% të rasteve të raportuara nuk është identifikuar burimi i infeksionit, çka nxjerr në pah dobësitë e thella të sistemit të survejancës epidemiologjike dhe mungesën e kapaciteteve laboratorike për të kryer hetime klinike të thelluara.
AKU në qendër të një zinxhiri skandalesh të përsëritura
Rasti i salmonit të infektuar nuk është i izoluar. AKU, me në krye Olsi Komicin, është akuzuar për neglizhencë dhe pasivitet në një sërë skandalesh të tjera, duke përfshirë:
• Kopshti në Gramsh, ku 17 fëmijë rezultuan pozitivë për bakterin Salmonella Enteritidis pas konsumit të vezëve të kontaminuara.
• Mishi i derrit nga Brazili, i cili përmbante Salmonella spp. dhe po trajtohet për asgjësim ose riciklim në treg, pa transparencë mbi sigurinë e këtij procesi.
• Mosreagimi ndaj vezëve të kontaminuara në Gramsh dhe Durrës, pavarësisht sinjalizimeve për 69 mijë pula të ngordhura dhe mijëra vezë të bllokuara në fermën “Rea’s”.
• 1,535 kg mish me salmonelë në rrjetin KFC – prej të cilave vetëm 177 kg u sekuestruan.
• 13.2 ton akullore të kontaminuara me oksid etileni, një substancë kancerogjene.
• Prania e minjve në thasët e miellit në fabrikën “Diamond”.
• 985 kg acuge të infektuara me parazitë.
• 4,516 kg fileto derri të kontaminuara me salmonelë.
• Zbulimi i 35 llojeve pesticidesh të ndaluara në produktet bujqësore.
Një tjetër rast tronditës ishte shpërndarja në supermarkete e salmonit të tymosur të kontaminuar me bakterin vdekjeprurës Listeria monocytogenes. Ky produkt, i importuar nga Serbia, u konsumua gjatë muajve qershor dhe korrik, përpara se të bëhej publik alarmi shëndetësor. Janë importuar 1,040 pako në katër formate (50 g, 100 g, 200 g dhe 300 g), me datë skadence më 6 korrik 2025.
Drejtësia duhet të veprojë. SPAK duhet të nisë një hetim të thelluar për të zbuluar dhe ndëshkuar të gjithë zinxhirin përgjegjës: nga fermeri, drejtuesit e AKU-së, deri tek zyrtarët më të lartë të Ministrisë së Bujqësisë.
Qytetarët nuk mund të ushqehen me frikë. Kjo është një krizë reale e shëndetit publik që kërkon përgjigje urgjente, masa drastike dhe transparencë të plotë.
