Një ngjarje e rëndë është parandaluar nga Policia e Tiranës pas mesnate në fshatin Kus, në periferi të kryeqytetit, ku një 45-vjeçar dhunoi bashkëshorten dhe fëmijët e mitur, si dhe qëlloi me armë zjarri drejt punonjësve të policisë që ndërhynë në banesën e tij.
Sipas njoftimit zyrtar, shtetasi Luan Alla, i cili dyshohet të ketë probleme të shëndetit mendor, reagoi me dhunë pasi në banesën e tij mbërritën forcat e Komisariatit Nr. 1 dhe njësia speciale “Shqiponja”, në kuadër të operacionit “Forest”. Ai hapi zjarr me kallashnikov ndaj efektivëve dhe më pas u largua drejt një zone të pyllëzuar, duke përfituar nga errësira dhe terreni i vështirë.
Policia u vu menjëherë në ndjekje të tij dhe, pas një operacioni që zgjati afro dy orë, arriti ta lokalizojë dhe ta arrestojë në pyllin përreth zonës.
Gjatë kontrollit, u sekuestruan si prova materiale një armë zjarri kallashnikov me fishek në fole dhe një thikë, që i dyshuari i posedonte pa leje.
Ngjarja ndodhi rreth orës 23:00 të mbrëmjes së kaluar dhe, sipas autoriteteve, ndërhyrja në kohë e Policisë ka shmangur një tragjedi familjare dhe ka parandaluar rrezikimin e jetës së efektivëve të angazhuar në operacion.
