Cristiano Ronaldo ka nënshkruar një kontratë të re rekord me klubin saudit Al Nassr, duke u bërë sportisti më i paguar në historinë e sportit. Marrëveshja e re i garanton legjendës portugeze mbi 500 milionë euro për dy vitet e ardhshme, duke e përforcuar statusin e tij si futbollisti më i pasur në botë.
Sipas raportimeve të SunSport, kontrata përfshin një pagë bazë ditore prej 488 mijë paundësh, me përfitime të shumta shtesë që mund të çojnë të ardhurat totale në më shumë se gjysmë miliardi paund deri në përfundim të marrëveshjes.
Përfitimet kryesore të kontratës përfshijnë:
- Pagë vjetore: £178 milionë;
- Bonus firmosjeje: £24.5 milionë, që mund të rritet në £38 milionë nëse aktivizohet viti i dytë;
- 15% aksione në klubin Al Nassr: me vlerë £33 milionë;
- Bonuse sportive: £4 milionë nëse fiton “Këpucën e Artë” dhe £8 milionë nëse Al Nassr shpallet kampion;
- Shërbime personale: 16 punonjës në dispozicion (3 shoferë, 4 pastruese, 2 kuzhinierë, 3 kopshtarë dhe 4 roje sigurie);
- Shpenzime jetese: £1.4 milionë në vit për stafin personal dhe £4 milionë për përdorimin e avionit privat;
- Marrëveshje sponsorizimi me kompani saudite: deri në £60 milionë.
Burime pranë Ligës Profesioniste Saudite konfirmojnë se rinovimi me Ronaldon ishte një prioritet absolut. “Ai është fytyra e ligës. E tërheq vëmendjen, yjet, sponsorët. Pa të, një pjesë e madhe e së tashmes dhe së ardhmes së kampionatit do të binte,” ka deklaruar një zyrtar i lartë për SunSport.
Autoritetet saudite dhe klubi Al Nassr e shohin Ronaldon jo vetëm si një lojtar, por edhe si ambasador strategjik të futbollit saudit. Ai konsiderohet figurë kyçe për tërheqjen e investimeve dhe emrave të njohur të futbollit në të ardhmen.
