Gazetari Klodian Tomorri ka deklaruar në emisionin “Task Force” me Sonila Meçon në SYRI TV se një kompani ndërtimi në Shqipëri ka pastruar 7.5 milionë euro të ardhura nga trafiku i drogës, të investuara në dy ndërtesa në Tiranë.
Sipas Tomorrit, vendet e Bashkimit Europian janë plotësisht të informuara mbi këtë situatë, pasi shumë prej bandave shqiptare janë arrestuar dhe dënuar në shtete të ndryshme europiane. “Ka nisur të diskutohet dhe të shqetësojë Europën që para dy vitesh. Të parët që reaguan ishin anglezët. Madje, gazetarë të The Times erdhën në Tiranë dhe publikuan një artikull për kullat,” tha ai.
Gazetari theksoi se dyshimet janë forcuar me kalimin e kohës, duke dalë gjithnjë e më shumë prova në mediat ndërkombëtare se ndërtimet në Tiranë dhe në bregdet po financohen me para të drogës.
“Nuk duhet të harrojmë proceset gjyqësore që janë zhvilluar në disa vende të BE-së. Në Belgjikë kemi pasur çështjen SKYEç, ku shqiptarë të përfshirë në trafik droge janë dënuar dhe në përgjime është zbuluar se ata dërgonin shuma të mëdha në Shqipëri, të cilat më pas investoheshin në ndërtim,” u shpreh Tomorri.
Ai solli në vëmendje edhe rastin e njohur të familjes Çopja, ku sipas tij, një kompani e lidhur me ta kishte investuar 7.5 milionë euro në vetëm një vit, në dy ndërtesa në Tiranë, duke përdorur para të ardhura nga aktiviteti kriminal.
“Ka tashmë një sërë provash që nuk janë vetëm nga brenda Shqipërisë, por janë dokumentuar dhe nga europianët përmes proceseve gjyqësore ndaj grupeve kriminale shqiptare,” përfundoi gazetari.
