Qeveria ka nisur shpërndarjen e granteve prej 5.6 milionë dollarësh për riparimin dhe meremetimi vetjak i banesave të dëmtuara nga tërmeti në Tiranë. Nga këto grante përfitojnë banorët e atyre banesave të cilat kanë pësuar dëme të lehta dhe të mesme dhe që kanë nevojë vetëm për rikonstruksione të lehta, duke marrë pagesë me para në dorë.
Në Tiranë përfitojnë 200 familje në banesa individuale dhe 2882 familje në banesa kolektive. Shuma totale e granteve për riparimin vetjak të banesave shkon në 80 milionë dollarë në të gjithë zonat e prekura nga tërmeti i 26 nëntorit, ndërsa nga kjo bashkia Tiranë shpërndan 5.6 milionë dollarë grante.
Në mbledhjen për dhënien e granteve të meremetimit vetjak të banesave në Tiranë, kryeministri Rama tha se qeveria do të paguajë për meremetimet e dëmeve të tërmetit, një shumë totale afro 8 miliardë lekë ose 80 milionë dollar.
“Janë 8o milion dollarë të cilat i kushtohen vetëm granteve për meremetimin sipas shkallëve të dëmeve. Aktualisht Bashkia e Tiranës ka 5.6 milion dollar në proces dhe nga ana tjetër jemi në procesin e fillimit konkret në terren të punës për ndërtimin e shtëpive. Qytetarët duhet të kuptojnë se kjo e sotmja është vetëm një pjesë. Janë dy mbledhje të tjera ku në presim të miratohen 3100 dosje të tjera”, tha Rama.
Nga ana tjetër, kreu i Bashkisë së Tiranës, Erion Veliaj tha se për Tiranë janë akorduar nga qeveria 700 milionë lekë, nga të cilat 560 milionë lekë si pagesa cach dhe të tjerat për rregullimin e ambienteve të përbashkëta. Veliaj shtoi se nga ky proces janë skualifikuar 300 dosje, dhe kryesisht janë ata që kanë pasur nga dy shtëpi në Tiranë.
“Qeveria ka akorduar mbi 700 milionë lekë, nga ku 560 milionë lekë pagesa cach dhe të tjerat me rregullimin e ambienteve të përbashkëta. Kemi rreth 300 dosje të skualifikuara dhe janë ata që kanë pasur një shtëpi të dytë në Tiranë. Të premten në farkë nis punë me ndërtimin e 50 shtëpive të para individuale, ndërsa lagja e parë që do të ndërtohet është Vaqarri”, tha Veliaj.
Po ashtu ministri i Rindërtimi Arben Ahmetaj tha se janë 140 shkolla të cilat janë në proces ndërtimi.
“650 milion euro do të financojnë një numër të madh shkollash. Me rëndësi janë njësitë individuale dhe po këtë javë bëhemi gati për punimet. Ndërtimi banesave kolektive urbane ka filluar detajimi i projekteve dhe besoj se në fund të shtatorit do të kemi punë në terren”, tha Ahmetaj.