TIRANË
Avokati i Emiljano Shullazit, Vladimir Meçi, i është drejtuar me një letër presidentit Ilir Meta, kryeministrit Edi Rama dhe kreut të Kuvendit Gramoz Ruçi, në lidhje me aplikimin e regjimit 41-biss për klientin e tij.
Avokati Meçi shprehet se vendimi i marrë për Shullazin është i padrejtë.
“Sqarojmë se Emiljano Shullazi, ka në paraburgim plot 4 vjet e 3 muaj, ne dy vjet e gjysëm ka qenë edhe i punësuar në Bibliotekën e Burgut, nuk ka asnjë vërejtje apo masë disiplinore për shkelje të rregullores ndaj tij. Si ta shpjegojmë që ky indicid, ka respektuar me përpikmëri rregulloren nga njëra anë dhe një ditë të bukur me diell, si ‘rrufe në qiell të pastër”, u bë “Armiku Publik” që duhej patjetër të izolohej në regjimin e posacëm 41 bis?”, vlerëson avokati.
Më tej, avokati Meçi kërkon që të rishikohet ligji 41-biss, me pretendimin se shkel të drejtat e njeriut.
“Nuk është asnjëherë e vonuar apo e tepërt të pranohet që ekzistojnë mangësi në një proces të hartimit e zbatimit të ligjit, apo që nuk janë marrë në konsideratë Aktet e marrëveshjet ndërkombëtare. Aq më tepër nuk është e vonuar apo e tepërt të rishikohet një gjendje e caktuar ligjore apo edhe e mënyrës së aplikimit të ligjit, kur kjo është në funksion të humanizmit, drejtësisë, barazisë para ligjit dhe distancimit nga politika që shpien në trajtime çnjerëzore, degraduese e me tipare të torturës”, thuhet ndër të tjera në letër.
