Ditën e sotme në Durrës është konfirmuar një rast i ri me koronavirus.
Bëhet fjalë për një 74-vjeçar, i cili ishte vetëkarantinuar.
I moshuari ka qenë i vetëkarantinuar në shtëpi, por gjendja e tij u përkeqësua dhe u soll menjëherë në spitalin Infektiv në Tiranë.
Mësohet se në kohën e shpërthimit të virusit, ai ndodhej në Bergamo të Italisë.
Durrësi në total numëron 11 të prekur, mes të cilëve 1 viktimë, duke u renditur i katërti qytet në Shqipëri me numrin më të lartët të të infektuarve, pas Tiranës, Fierit dhe Korçës.
Ndërkohë në total, numri i të prekurve nga koronavirusi në vendin tonë ka shkuar në 186, në mesin e të cilëve 31 të shëruar dhe 8 viktima.
Në spitalin Infektiv janë shtruar 77 persona, 3 prej të cilëve në terapi intensive.
Hartës së qyteteve të prekura i është shtuar edhe Puka me dy raste, të cilët dyshohet se janë infektuar nga kontakti i parë i pacientit zero, i cili është shëruar tashmë.
Autoritetet ndërkohë vijojnë me thirrjet për respektimin e rregullave të higjienës, distancimit social dhe kufizimit të daljeve nga shtëpitë.
