Kryeministri Edi rama ka komunikuar ditën e sotme se në Shqipëri mund të kenë hyrë variantet e reja të koronavirusit. Në një konferencë të palajmëruar më parë, ai tha se ka sinjale të arsyeshme se variant i ri i COVID ka mbërritur në vendin tonë. Ndër të tjera, Rama ka thënë se masat e marr janë të duhurat, por nuk zbatohen, duke e kaluar përgjegjësinë te qytetarët dhe jo te kolapsi i shëndetësisë. Madje Rama ka komentuar edhe politikanët, duke thënë se ata i shkelin rregullat të parët. Shumë figura të njohura të Partisë Socialiste, ministra e deputetë janë parë nëpër takimë fushate me shumë njerëz të grumbulluar.
“Kemi sinjale te arsyeshme se në Shqipëri kanë hyrë variante të reja të covid 19…kemi rritje të infektimeve edhe në grupmoshat e reja. Jemi shumë të motivuar të bëjmë çdo gjë si duhet që të mos detyrohemi të kthehemi tek masat e forta kufizuese. Për ketë duhet motivim i gjithsecilit. Ajo që po konsiderohet kudo si një tjetër valë infektimesh dhe që u vu re me numra që u rritën në mënyrë dramatike po reflektohet tani edhe këtu.
Masat që janë në fuqi janë masa që në këndvështrimin e ekspertëve të komitetit teknik funksionojnë, por që të funksionojnë siç duhet, duhen zbatuar. Është vënë re një shkelje rregullash kohët e fundit, është e papërgjegjshme që edhe politikanët i shkelin rregullat nëpër grumbullime”,- tha Rama.
