Kryeministri Edi Rama ka komentuar raportin e Komisionit Europian për Shqipërinë, në një konferencë të përbashkët me ambasadorin e BE, Luigi Soreca. Rama ka thënë se raporti thotë se Shqipëria i ka plotësuar kushtet për të hapur diskutimet e anëtarësimit.
Ai theksoi se Komisioni Europian është një partner i drejtë dhe i paanshëm që e vlerëson progresin duke u bazuar në fakte.
“Siç e dini, është tanimë një traditë që raporti i Komisionit Europian dorëzohet në mënyrë protokollare edhe në Shqipëri, si në të gjitha vendet që janë në këtë proces, dua ta falenderoj ambasadorin Soreca, për jo vetëm këtë prani në momentin më të rëndësishëm të ndërveprimit mes Shqipërisë dhe KE, por sinqerisht për punën e madhe dhe të palodhur të të gjithë ekipit të delegacionit, një punë që zhvillohet çdo ditë pa orar, pa vëmendjen e publikut dhe të medias.
E kam thënë në më shumë se një rast që ky është një instrument që ne na ofron vetëm BE, vende që janë në një fazë të ndërmjetme, kalimi nga një stad i caktuar, siç ishim me në diktaturë, në një demokraci funksionale. Është e rëndësishme që të gjithë ta kuptojnë, se përtej vetë anëtarësimit është një proces i brendshëm, për të pasur këtu ku jetojmë të gjitha normat dhe standardet e një shteti modern.
Raporti është në vazhdën e raporteve të tjerë, ku Komisioni thotë që Shqipëria i ka plotësuar të gjitha kushtet, për të ndërmarrë së bashku me BE diskutimin e anëtarësimit. Dua të theksoj diçka që e kam theksuar vijimësisht, dhe në forumet më të larta mes vendeve të BP dhe BE, se meqë jemi te Komisioni Europian, nja partner i drejtë dhe i paanshëm, një partner që e vlerëson progresin duke u bazuar në hulumtimin e fakteve në terren”, ka thënë Rama.
