Presidenti i vendit, Ilir Meta ka zbardhur pjesë nga takimi me presidentin slloven, Borut Pahor. Meta ka thënë se qytetarët e Kosovës meritojnë sa më parë liberalizimin e vizave me Bashkimin Europian dhe të njëjtin qëndrim ka shprehur edh Pahor. Të dy presidentët kanë nënvizuar rëndësinë e dialogut mes Kosovës dhe Serbisë dhe arritjen e një marrëveshjeje reciprokisht të pranueshme. Meta shkruan se e ardhmja e Ballkanit perëndimor nuk është ndryshimi i kufijve, por heqja e tyre ashtu si në Bashkimin Europian.
“Qytetarët e Kosovës meritojnë sa më parë liberalizimin e vizave me Bashkimin Europian.
Të njëjtin qëndrim më shprehu sot edhe Presidenti i Sllovenisë, Borut Pahor, me të cilin gjithashtu nënvizuam rëndësinë e vijimit të dialogut Kosovë-Serbi për arritjen e një marrëveshjeje të qëndrueshme dhe reciprokisht të pranueshme nga të dyja palët, që do të përshpejtonte proceset integruese të këtyre vendeve. E ardhmja e vendeve të Ballkanit Perëndimor nuk është ndryshimi i kufijve por heqja e tyre si në vetë Bashkimin Europian, nëpërmjet bashkëpunimit më të ngushtë rajonal dhe të distancimit nga e kaluara e hidhur”, shkruan Meta.
Presidenti u takua sot me homologun slloven Borut Pahor me të cilin ndër të tjera diskutoi edhe për zgjerimin e BE në Ballkan që i shërben paqes dhe stabilizimit.
