Ditën e sotme, kryeministri Edi Rama së bashku me ministren e Infrastrukturës dhe Energjisë, Belinda Ballukun njoftuan për hapjen e një koncesioni ndërkombëtar, për atë që do të fitojë hartimin e projektit inxhinierik për ndërtimin e Tunelit të Llogarasë.
Ministrja Balluku tha:
“Ky do të jetë një tunel që pas ndërtimit do të kërkojë mbështetje financiare edhe nga përdoruesit duke aplikuar tarifë minimale.
Kjo do të ndihmojë të paguajë sasinë e parave që do të vendosen për ndërtimin e tunelit”.
Rama dhe Balluku deklaruan sot se projekti i ndërtimit të Tunelit të Llogarasë do të financohet nga qeveria dhe kjo sipas tyre, kërkon mbështetje financiare nga përdoruesit duke shtuar aplikimin e një takse nga qytetarët.
Sipas disa të dhënave të publikuara ditën e djeshme nga “Eurostat” për vitin 2019, Shqipëria vijon të mbetet vendi më i varfër i Europës.
Nga këto të dhëna, rezulton se shqiptarët kishin të ardhura për frymë sa 31% e mesatares europiane, më e ulëta në Europë, por kjo nuk e pengon kryeministrin Rama dhe ministren Balluku të shtojnë taksat për shqiptarët.
Njoftimi i Ministrisë së Infrastrukturës dhe Energjisë:
“Llogaraja për 10 minuta, pa ngjitje-zbritje!
Hodhëm sot hapin e parë për të bërë realitet një tjetër vepër të ëndërruar prej shumë vitesh.
Hapëm garën ndërkombëtare për projektin inxhinierik të Tunelit të Llogarasë, për të bërë të mundur që brenda këtij viti të hapim garën për ndërtimin e kësaj vepre.
Tuneli i Llogarasë është një komponent i rëndësishëm i plotësimit të infrastrukturës rrugore me rëndësi të madhe turistike e ekonomike, e cila do të lehtësojë aksesin drejt bregdetit të jugut për të gjithë vizitorët.
Një vepër inxhinierike e nivelit të lartë, që do i shtojë edhe më shumë bukurinë e gjithëpranuar kësaj pjese të Shqipërisë.
Rama u shpreh se faza e dytë, ajo e ndërtimit të tunelit “do të ndërtohet nga kompani vendase që kanë eksperiencën për ndërtimin e veprave komplekse.”
Në maj të 2019-ës qeveria njoftoi edhe dhënien me koncesion të autostradës Tiranë-Durrës, ku qytetarëve do t’u duhej të paguanin një tarifë për të kaluar.
https://www.facebook.com/ministriaeinfrastrukturesdheenergjise/posts/1682753065213227
