Në 24 orët e fundit në vendin tonë janë konfirmuar 71 raste të reja me koronavirus.Qarku Dibër ka tashmë 10 raste aktive me të infektuar me Covid-19. Këtë të hënë u shfaq një rast i ri me Covid-19 në Bulqizë. Ndërkohë, mësohet se i infektuari është pjesë e stafit të Njësisë Vendore të Kujdesit Shëndetësor Bulqizë.
Dyshohet se mjeku është infektuar në Tiranë gjatë fundjavës.Për këtë arsye ky institucion është mbyllur, si dhe janë dezinfektuar të gjitha ambientet e tij. Qytetarët e Bulqizës, të cilët kanë dashur të marrin shërbim pranë këtij institucioni këtë të hënë, i kanë gjetur dyert e tij të mbyllura. I gjithë personeli i NJVKSH Bulqizë është karantinuar, si dhe janë marrë tamponë për të gjithë.
Mati vijon të ketë rastet aktive të zbuluara në fillim të javës së kaluar, ndërsa në Dibër është shtuar një rast i ri të dielën pas rezultateve të 23 tamponëve të marrë nga personeli i spitalit Rajonal të Peshkopisë dhe familjarë të të infektuarve nga Maqellara dhe Melani, njëri prej të cilëve ndodhet në Spitalin Infektiv në Tiranë.
Rastet e tjera pozitive gjatë 24 orëve janë konfirmuar: 24 raste në Tiranë, 8 në Elbasan, 6 në Durrës, nga 5 raste në Krujë, Kukës, Lezhë, 4 në Kurbin, 3 në Vlorë, nga 2 raste në Korçë, Shkodër, Përmet, dhe nga 1 rast në Delvinë, Vau Dejës, Kamëz, Fier.
Dhe ndarja gjeografike e 10 rasteve në Qarkun Dibër është Mati 6, Dibra 3 dhe Bulqiza 1.
Institucionet shëndetësore vijojnë të apelojnë qytetarët që të jenë vigjilentë me situatën, të respektojnë masat mbrojtëse, siç është vendosja e maskave në ambiente të mbyllura dhe me shumë njerëz.
