Pas publikimit të videos së konfliktit tragjik në shkollën 9-vjeçare “Fan Noli” në Tiranë, ku humbi jetën i mituri Martin Cani, Prokuroria ka regjistruar një procedim penal për veprën penale “Zbulimi i akteve ose të dhënave sekrete”, sipas nenit 295/a të Kodit Penal.
Materiali i publikuar nga disa media dhe portale përmban pamje të datës 18 nëntor 2024, ku duken të miturit e përfshirë në ngjarje, të shoqëruar me gjeneralitetet e tyre.
Këto pamje, sipas Prokurorisë, janë identike me ato që ndodhen në një CD të administruar si provë materiale në fashikullin hetimor, dhe që janë marrë nga kamerat e sigurisë të zonës pranë vendit të ngjarjes.
Gjatë hetimit, kjo CD u vu në dispozicion të përfaqësuesit ligjor të familjes së viktimës, avokatit, i cili e mori bashkë me të gjitha aktet e fashikullit, kundrejt firmosjes së një deklarate për mospublikim të përmbajtjes së tyre.
Për shkak se çështja është në gjykim dhe po zhvillohet me dyer të mbyllura në Gjykatën e Shkallës së Parë të Juridiksionit të Përgjithshëm në Tiranë, Prokuroria vlerëson se publikimi i pamjeve përbën shkelje të nenit 103 të Kodit të Procedurës Penale.
Ky nen ndalon publikimin e provave të shqyrtimit gjyqësor me dyer të mbyllura, si dhe të dhënave identifikuese të personave të mitur të përfshirë në proces si të pandehur, viktima apo dëshmitarë.
Në këtë kuadër, organi i akuzës konsideron se janë plotësuar kushtet për ekzistencën e veprës penale “Zbulimi i akteve ose të dhënave sekrete” dhe ka nisur procedimin penal për të identifikuar dhe ndëshkuar autorët e publikimit të paligjshëm të këtyre materialeve.
