Më 11 qershor 2025, Komiteti i Përfaqësuesve të Përhershëm të 27 vendeve anëtare të Bashkimit Evropian vlerësoi se Shqipëria është e gatshme të ecë përpara në procesin e anëtarësimit dhe autorizoi Presidencën e BE-së për të nisur hapjen e negociatave për Grupkapitullin 4: “Agjenda e Gjelbër dhe Ndërlidhja e Qëndrueshme”.
Në vijim të këtij vendimi, Presidenca Polake i dërgoi sot një letër zyrtare Shqipërisë, ku i kërkon të paraqesë pozicionin e saj negociues për katër kapituj kyç, të cilët do të shqyrtohen në Konferencën e Gjashtë Ndërqeveritare, që pritet të mbahet së shpejti.
Këta kapituj janë:
• Kapitulli 14 – Politika e Transportit: përmirësimi i infrastrukturës rrugore dhe hekurudhore, rritja e sigurisë dhe zhvillimi i një sistemi transporti të qëndrueshëm;
• Kapitulli 15 – Energjia: garantimi i një furnizimi të qëndrueshëm, të sigurt dhe të përballueshëm me energji;
• Kapitulli 21 – Rrjetet Trans-evropiane: përforcimi i lidhjeve infrastrukturore të Shqipërisë me vendet e BE-së, në kuadër të Korridoreve Evropiane;
• Kapitulli 27 – Mjedisi dhe Ndryshimet Klimatike: përmbushja e standardeve të BE-së për mbrojtjen e mjedisit dhe përballimin e krizës klimatike.
Hapja e negociatave për këto kapituj përfaqëson një hap të rëndësishëm në procesin e integrimit dhe është një mundësi konkrete për Shqipërinë që të afrohet më shumë me standardet evropiane në fusha që prekin drejtpërdrejt jetën e qytetarëve.
Përmirësimi i infrastrukturës, fuqizimi i ndërlidhjes rajonale dhe evropiane, zhvillimi i sektorit energjetik dhe mbrojtja e mjedisit janë shtyllat kryesore që do të udhëheqin këtë etapë të re të procesit të negociatave.
