Një sasi prej 10 tonësh mandarina, që u kthyen nga Kroacia për shkak të përmbajtjes së lartë të pesticidit, janë hedhur përsëri në tregun shqiptar për konsumim.
Prokuroria e Rrethit të Beratit ka konfirmuar ngjarjen dhe ka ndaluar tre persona që janë të përfshirë në këtë aktivitet të paligjshëm.
Sipas hetimeve, fermeri Elton Tafa kishte shitur mandarinat te Arben Dyli, administrator i një pike grumbullimi, i cili më pas i eksportoi ato në Kroaci. Autoritetet kroate, pas analizave të kryera, konfirmuan praninë e pesticidit të dëmshëm, çka çoi në kthimin e ngarkesës në Shqipëri.
Në vend që të asgjësoheshin sipas rregullave, dyshohet se mandarinat u hodhën sërish në treg nga Arben Dyli.
Po ashtu, hetimet zbuluan se Elson Tahiraj, inspektor pranë Drejtorisë Rajonale të Veterinarisë dhe Mbrojtjes së Bimëve, ka shpërdoruar detyrën duke lëshuar certifikata fitosanitare fiktive për disa subjekte, përfshirë atë të Dylit.
Pas disa muajsh hetimesh nga Seksioni për Krimin Ekonomik-Financiar, në bashkëpunim me Prokurorinë pranë Gjykatës së Shkallës së Parë Berat, janë arrestuar tre shtetas:
• Arben Aqif Dyli, 54 vjeç
• Elton Hekuran Tafa, 45 vjeç
• Elson Petrit Tahiraj, 29 vjeç
Ata po hetohen për shkeljen e rregullave mbi lëndët helmuese, prodhimin dhe shitjen e ushqimeve të rrezikshme për shëndetin, mashtrimin me produktet ushqimore dhe shpërdorimin e detyrës.
Materialet hetimore janë dërguar për veprime të mëtejshme në Prokurorinë përkatëse.
