Lulzim Basha deklaroi sot nga protesta e opozitës se dhuna është e vetmja zgjidhje që ofron kryeministri Edi Rama.
Mbi të gjithë dhe pa çadër, Basha tha se opozita ofron bashkimin e shpirtrave kundër dhunës.Kreu demokrat Lulzim Basha nga protesta e opozitës deklaroi se kjo opozitë do ta fitojë betejën për zgjedhje të lira dhe të ndershme. Basha u shpreh se Ramës dhe krimit në pushtet do i vijë fundi nga qytetarët shqiptarë.
“Dhuna barbare e Edi Ramës dhe veglave të tij kriminale po shihet gjithkund. Këtu kemi ardhur si rezultat i dhunës shtetërore. Dhuna shtetërore është produkt i dhunës zgjedhore. Ne nuk jemi këtu për pushtet dhe për karrige, as për mandate, se i dogjëm, sepse jemi dhe do të jemi në krah të qyterarëve në këtë betejë me krimin.
Ne kemi në këtë betejë për të çliruar Shqipërinë nga krimi, korrupsioni, ne jemi në betejë për Kushtetutë, ligj, për shtet të së drejtës, për dinjitetin dhe lirinë e çdo shqiptari, që kurrë mos të ketë asnjë qeveritar të dhunojë e përqesh qytetarët shqiptarë. Ne duhet dhe do ta fitojmë betejën për zgjedhje të lira, për një Republikë për shqiptarët.
Të dënojmë Ramën dhe krimin. Rruga drejt BE-së nuk është me krimin, me kriminelët, karshi qytetarëve. Hidhini sytë këtij sheshi të tejmbushur. Ne luftojmë për vlerat e Perëndimit, ky është marshim protestë kundër qeverisë së bërë njësh me krimin. Rama ik. Zgjedhje pa përdhunuesin serial, Edi Ramën.”- tha Basha.
Menjëherë pas fjalimit të tij kryetari PD-së Lulzim Basha ka ftuar qytetarët të marshojnë drejt Drejtorisë e Përgjithshme e Policisë.
Me konsensus Basha dhe qytetarët kanë vendosur të marshojnë drejt Drejtorisë e Përgjithshme e Policisë, më pas drejt Parlamentit, Ministrisë së Brendshme dhe Drejtorisë së Policisë së Tiranës.
‘Sipërmarrës, të papunë, intelektualë, pensionistë, të gjithë bashkë në një betejë, krah për krah për të çliruar Shqipërinë nga qeveria e krimit. Jemi para selisë së kryeministrit ilegjitim që i ka orët e numëruara dhe do të marshojmë së bashku ne 5 pikat që simbolizojnë institucionet që u ka vjedhur shqiptarëve. Së pari drejt institucionit të kryeministrit, që nuk nxjerr më ligje, më pas drejt Drejtorisë e Përgjithshme e Policisë, me mesazhin se ne duam një polici të ligjit, jo një polici të krimit. Pas kësaj drejt Parlamentit, dhe më pas drejt Ministrisë së Brendshme, ku sundon një njeri që s’njeh kushtetutë dhe ligj, por vetëm një vegël e verbër. Dhe së fundmi aty ku mbahen me pahir vëllezërit dhe motrat tona, në Drejtorinë e Policisë së Tiranës,’ -tha Basha para nisjes së marshimit.
