Kryetari i Bashkisë së Vlorës, Dritan Leli ditën e sotme ka takuar nga afër pronarët e lokaleve që dolën në protestë. Leli më pas në një deklaratë në media ka folur lidhur me shqetësimin e tyre. Leli është shprehur se bizneset dhe policia duhet të jenë në respekt të ligjit, ndërsa ka kërkuar mirëkuptimin e pronarëve të lokaleve për të ulur muzikën në orarin që është përcaktuar.
Gjithashtu ai ka theksuar se është në komunikim të vazhdueshëm me bizneset dhe se ky që ka zhvilluar ditën e sotme nuk është takimi i parë.
“Ky nuk është takimi i parë që ne kemi pasur me bizneset, i kam pritur më herët dhe në zyrën time sa i takon çështjes së taksave.
Fasha orare është shtyrë me një orë, ajo që dua të ndaj me qytetarët është shqetësimi për shkak të ndotjes akustike, që hera herës krijon një rrëmujë të paimagjinueshme.Për fat kryeministri ka dhënë fashën e re orare që është ora 11. Nuk është një gjë e vogël, është një orë më shumë.
Muzika me zë të lartë presupozon që njerëzit të flasin me zë më të lartë, duke përbërë rrezik të mëtejshëm për përhapjen e pandemisë. Unë mendoj se vendimmarrja për muzikën është e drejtë, ka shumë ankesa në lidhje me policinë, unë kam vendosur një takim dhe me kreun e policisë, për të shprehur shqetësimet që ata kanë.
Nuk mund të ftosh klientët pak minuta para fashës orare, në një kohë që në çdo vend tjetër nëse shkon 30 minuta para mbylljes të thonë se kuzhina është e mbyllur.
Vlora ka njerëz me temperament të fortë, siç janë biznesmenët e qytetit, por në fund fare janë njerëz që shërbejnë. Pronarët e bizneseve të Lungomares janë në komunikim të vazhdueshëm me kreun e Bashkisë për çdo problematikë që ata kanë, dhe kemi pasur një marrëdhënie të shkelqyer, ne jemi në kontakt të herëpashershëm.
Unë nuk do të doja të shihja absolutisht pamje të tilla, nëse bizneset do të ishin të mbyllura, jam i sigurt që punonjësit e policisë nuk do të ishin aty, të dyja palët duhet të respektojnë ligjin dhe rregullat që janë në fuqi”, u shpreh Leli.
Gjithashtu sjellim në vëmendje se duke filluar që nga data 20 korrik, orari për lejimin e muzikës do të zgjatet me 1 orë, pra deri në orën 23:00.
