Prokuroria e Korçës ka dërguar për gjykim shtetasin Artur Rakipi, i cili akuzohet për tetë vepra penale në lidhje me falsifikimin e dokumenteve dhe aktivitete të tjera kriminale.
Hetimet, të cilat filluan më 24 korrik 2023 pas sekuestrimit të materialeve të falsifikuara, zbuluan se Rakipi, në bashkëpunim me persona të tjerë, drejtonte një laborator të pajisur me të gjitha mjetet e nevojshme për falsifikimin e dokumenteve.
Ai falsifikonte letërnjoftime, pasaporta, dokumente zyrtare, dhe madje kartëmonedha të cilat i tregtonte për një çmim 15-20% më të ulët se vlera e tyre e vërtetë.
Prokuroria zbuloi gjithashtu se Rakipi vazhdoi aktivitetin edhe pas masës së sigurisë “Arrest në shtëpi”.
Gjatë hetimeve, u kryen veprime simuluese dhe u vërtetua se dokumentet e falsifikuara, përfshirë letërnjoftime dhe pasaporta, ishin të falsifikuara dhe përdorej një ndërmjetës, shtetasi B.D., për të bërë kontaktin dhe marrë pagesat.
Gjatë kontrollit të banesës së këtij të fundit, u sekuestruan printera, kompjutera, vula të falsifikuara, pasaporta të shteteve të ndryshme dhe pajisje për falsifikimin e dokumenteve.
Nga hetimet rezultoi se Rakipi kishte falsifikuar një numër të madh dokumentesh, përfshirë leje drejtimi, leje qëndrimi, certifikata aftësimi profesional dhe dokumente shëndetësore për shtete të ndryshme.
Ai gjithashtu përdorte vulat e institucioneve shtetërore shqiptare dhe të huaja për të falsifikuar dokumente të tjera, për të cilat janë ngritur akuza të rënda.
Prokuroria e Korçës ka ngritur akuzat për veprat penale të “Falsifikimi i dokumenteve”, “Falsifikimi i letërnjoftimeve dhe pasaportave”, “Falsifikimi i vulave”, “Falsifikimi i akteve të gjendjes civile”, dhe “Përvetësimi i parave që rrjedhin nga veprimtaria kriminale”.
