Policia i gjeti në një zonë të thellë të Karaburunit, publikohen foto të çiftit hungarez

Google+ Pinterest LinkedIn Tumblr +

Ditën e dielë dy turistë hungarezë humbën në pyllin e Llogarasë, e ndërsa mëngjesin e sotëm policia njoftoi se ata u gjetën shëndoshë e mirë në një zonë të thellë të Karaburunit.

Kontrolli për gjetjen e tyre vazhdoi gjatë gjithë natës, pasi mendohej se çifti i turistëve ishte strehuar në gjirin e Shën Andreas.

Mëngjesin e sotëm, çifti i turistëve kishin njoftuar me një mesazh në celular se ndodheshin në një zonë të thellë të Karaburunit.

Pas mesazhit të tyre, policia ka shkuar në ndihmë, ku edhe i ka gjetur shëndoshë e mirë.

Tashmë janë publikuar edhe fotot e çiftit, nga të cilat duken se janë në gjendje të mirë shëndetësore.

Njoftimi i Policisë:

Policia gjen turistët hungarezë S.D. dhe B.M., të cilët kishin humbur rrugën mbrëmjen e kaluar, në zonën e Karaburunit

Në lidhje me humbjen e rrugës nga çifti hungarez ditën e djeshme në zonën e Karaburunit, pas kërkimeve të pandërprera të shërbimeve të Policisë Kufitare, Delta Forcë dhe shërbimeve të tjera vendore është bërë i mundur lokalizimi i tyre, nëpërmjet GPS, rreth orës 06:30 të mëngjesit të sotëm.

Menjëherë janë nisur shërbime të tjera shtesë drejt vendndodhjes, pasi terreni ishte tepër i vështirë e i thellë dhe rreth orës 10:00 është bërë e mundur gjetja e tyre dhe kontakti fizik me ta pranë vendit të quajtur “Lerat”, në Llogora.

Çifti kishte humbur kontaktet, rrugën dhe orientimin një dite më parë dhe për shkak të terrenit të vështirë dhe errësirës, e kishte të pamundur kthimin mbrapa.

Aktualisht po bëhet transportimi i çiftit pranë vendndodhjes së tyre në zyrat e zonave të mbrojtura, në Parku e Llogarasë.

Turistët janë në gjendje të mirë shëndetësore dhe kanë falënderuar shërbimet e kërkimit që iu erdhën në ndihmë.

Shpërndaje
Share.

Komento