Policia e Kosovës ka zhvilluar një aksion policor që ka nisur që në tetor të vitit të kaluar. Aksioni u mbajt nga Drejtoria për Hetimin e Krimit të Organizuar në Policinë e Kosovës dhe Prokuroria Speciale, duke e çuar në 12-të numrin e të arrestuarve. Të arrestuarit akuzohen për vepra penale si penale krim të organizuar, falsifikim i dokumenteve dhe kontrabandim me migrantë dhe raste të posaçme të falsifikimit të dokumenteve
Gazeta Express shkruan se, prokurorja speciale Habibe Salihu dhe Drejtoresha e Kundër Krimit të Organizuar, Florie Hajra kanë dhënë detaje për aksionin e nisur mëngjesin e sotëm në një konferencë.
“Aksioni është vazhdimësi i aksionit të muajit tetor. Ka rezultuar me tre të arrestuar, të arrestuarit janë të dyshuar për vepra penale krim të organizuar, falsifikim i dokumenteve dhe kontrabandim me migrantë dhe raste të posaçme të falsifikimit të dokumenteve”,- tha Salihu
Ndërkohë, Florie Hajra ka thënë se aksioni është mbajtur në 12 vende dhe janë arrestuar 9 persona. Më parë në tetor kanë rënë në pranga tre persona.
“Në tetor janë kontrolluar pesë lokacionë dhe janë arrestuar tre të dyshuar. Ndërsa në aksionin e nisur në orët e hershme të mëngjesit të sotëm janë kontrolluar 12 lokacione dhe janë arrestuar 9 të dyshuar. Janë gjetur laboratorë të pajisur me aparatura dhe materiale për prodhimin e dokumenteve të falsifikuara, si pasaporta, kartela identifikimi, etj. Të gjitha këto nga më shumë se 16 shtete të ndryshme, kryesisht të Bashkimit Europian. Kemi 12 persona të dyshuar që me urdhër të prokurorit ndodhen në mbajtje. Të tjerët në paraburgim me urdhër të Gjykatës. Hetimet janë kryer në bashkëpunim me Euoropolin, Shqipërinë dhe disa shtete të BE-së”,– shtoi ajo.
