Vetëm pak ditë më parë 50 forca të Policisë së Shkodrës, FNSH dhe RENEA zbarkuan në Grudë të Shkodrës, ku zhvilluan një kontroll të befasishëm për të arrestuar Eljon Haton.
Hato ishte shpallur në kërkim si person i dyshuar dhe i përfshirë në dosjen “Metamorfoza” dhe njëkohësisht ai është mik me personazhin e njohur të drejtësisë shqiptare, Ervis Martinaj, i cili rezulton i zhdukur prej 1 viti.
Lidhur me këtë aksion të policisë, ka folur eksperti i Kriminalistikës, Ervin Karamuço, në ABC News, ku theksoi se ka dyshime të forta se operacioni në Grudë është dekonspiruar.
“Operacioni dyshohet se është dekonspiruar. Ky ka qenë problem më i madh. Mund të jetë pjesë e një dekonspirimi, fakti që nuk është kapur ky person. Në kushtet e flagrancës nuk mund të kesh një mandat kontrolli. Nuk e di se kush ka qenë flagranca. Operacioni është shfrytëzuar për kërkimin e peronave, të cilët janë ende në arrati. Çdo kontroll i kryer në mënyrë të paligjshme dhe çfarëdo prove mbledh, provat janë të paligjshme”, tha ai.
Ndër të tjera Karamuço tha se Ministria e Brendshme duhet të zbardhë misterin, e zhdukjes së Ervis Martinajt. Ai tha se deri tani nuk ka ende asnjë provë ADN-je, e cila do konfirmonte pistën e vrasjes së Martinaj.
“Këtë duhet ta thotë ish-ministri i Brendshëm dhe ministri i tanishëm. Për sa kohë që nuk gjejmë edhe një qelizë të vetme ADN-je, ne nuk mund flasim për asnjë pistë. Nuk ka ende një provë, që të vërtetojë njërën pistë apo dhe tjetrën. Policia ka informacion për fatin e tij, por nuk e bën publik, për sa kohë nuk e provon dot”, tha ai.
