Po na i marrin? Dy helikopterë shqiptar me vlerë 17 mln euro, transferohen në Itali…

Google+ Pinterest LinkedIn Tumblr +

Shqipëria edhe pse një vend anëtar i NATO-s ka një flotë fare modeste mjetesh ushtarake ajrore, që të gjitha të përbëra vetëm nga helikopterë.

Por edhe një pjesë e tyre të rinj dhe disa të dhuruar nga shtete mike, këto mjete nuk janë sot më operativ në shërbim, duke bërë që disa helikopterë bashkë me ata të kohës së komunizmit të mbushin hangarët e bazës së Farkës.

Por edhe ato pak mjete që kanë qenë operativë në vitet e fundit, janë përfshirë nga defekte, duke bërë që mungesa e tyre të ndjehet mjaftë sidomos në rastet e fatkeqësive natyrore, zjarreve në male, apo edhe në operacione shpëtimi.

Së fundi, edhe dy helikopterë të rinj të Forcave të Armatosura me vlerë rreth 17 milionë euro do të zhvendosen drejt Italisë.

Kjo në fakt nuk lidhet me asnjë taktikë ushtarake, por sipas një procedure të Ministrisë së Mbrojtjes, duket se shërbimet e mirëmbajtjes së tyre nuk mund të kryhen në vendin tonë.

Në një dokument ministria kërkon një kompani private që përmes transportimit me trajler (kamion) të zhvendosë dy helikopterët të tipit “EC-145” me vlerë respektivisht: EC-145 (FA-635) : 894,599,652 lekë, EC-145 (FA-636) : 1,227,018,745 lekë.

“Shërbimi që kërkohet: Transporti tokësor ndërkombëtar i dy helikopterëve sipas itinerarit nga baza ajrore, Farkë, Tiranë – në ambientet e ofruesit të shërbimit të mirëmbajtjes së helikopterëve në Trento, Itali (vetëm vajtje)

Afatet e ekzekutimit: duke filluar menjëherë pas lidhjes së kontratës me përfundim pas marrjes në dorëzim të helikopterëve nga ofruesi i shërbimit të mirëmbajtjes”,- thuhet në specifikimet teknike të dokumenteve të Ministrisë së Mbrojtjes.

Për të kryer këtë shërbim, Ministria ka vënë në dispozicion një fond limit prej 6.85 milionë lekësh dhe afati për të dorëzuar ofertat është data 29 shtator.

Ministria ka dhënë specifikime edhe për llojin e helikopterëve, si dhe përmasat e tyre duke nënvizuar se: gjatësia e tyre është 10 metra, gjerësia 3.2 metra, lartësia 3.45 metra.

Pesha e helikopterëve bosh është 2290 kg dhe për këtë është rekomanduar një trajler i tipit “Xhumbo”.

/GazetaReforma.com/

 

Shpërndaje
Share.

Komento