Operacioni policor i koduar “Koordinata” ka vijuar me kontrolle të shtuara në territorin e qarkut Shkodër, me qëllim goditjen e rasteve të kultivimit të bimëve narkotike.
Si rezultat, janë zbuluar dhe asgjësuar gjithsej 2943 bimë kanabis, të mbjella në zona të ndryshme të veriut.
Në njësitë administrative Pult dhe Shosh, efektivët e Komisariatit të Policisë Shkodër kanë gjetur 735 bimë narkotike. Ndërkohë, në Kastrat dhe Gruemirë, strukturat e Komisariatit të Policisë Malësi e Madhe kanë evidentuar dhe asgjësuar 1631 bimë të dyshuara.
Në zonat Temal dhe Shllak, nën juridiksionin e Komisariatit të Policisë Vau i Dejës, janë gjetur dhe asgjësuar 139 bimë narkotike, ndërsa në Luf-Qerret dhe Gjegjan, efektivët e Komisariatit të Policisë Pukë kanë zbuluar edhe 438 bimë të tjera.
Në kuadër të operacionit janë proceduar penalisht dy roje të shërbimeve pyjore dhe të zonave të mbrojtura: V. P., roje pyjesh, dhe A. K., roje e zonave të mbrojtura.
Të dy dyshohen për shpërdorim detyre dhe për përfshirje në kultivimin apo mbrojtjen e bimëve narkotike në zonat përkatëse.
Operacioni “Koordinata” është pjesë e fushatës së gjerë të Policisë së Shtetit për të luftuar kultivimin e lëndëve narkotike dhe aktivitetet e paligjshme të lidhura me krimin e organizuar në të gjithë territorin e vendit.
Kontrollet dhe hetimet pritet të intensifikohen edhe më tej në ditët në vijim.
