Plagosi me kallash 48-vjeçarin gjatë ndeshjes së Kombëtares, i riu vetëdorëzohet në polici

Google+ Pinterest LinkedIn Tumblr +

Ditën e djeshme është vetëdorëzuar në policinë e Korçës, autori i plagosjes së disa ditëve më parë.

J.H 28 vjeç hapi zjarr ndaj 48-vjeçari me iniciale  I.H. në një lokal të qytetit, në momentin kur Kombëtarja e Shqipërisë, po luante ndaj Francës.

I riu shkoi në polici së bashku me avokatin e tij.

Gjatë marrjes në pyetje, 28-vjeçari tregoi edhe vendin ku kishte hedhur armën e krimit.

Mbi të rëndojnë akuzat “Vrasje me paramendim e mbetur në tentativë” si dhe “Mbajtje pa leje dhe prodhimi i armëve dhe municionit”.

Ndërkohë përsa i përket të plagosurit, ai ndodhet jashtë rrezikut për jetën.

Kujtojmë që natën kur ndodhi krimi, I.H. ishte i shoqëruar nga dy persona të tjerë.

Njoftimi i policisë

Në vijim të punës për kapjen e autorit të dyshuar të ngjarjes, kontrolleve të shumta të ushtruara nga ana e Policisë Korçë, si edhe falë bashkëpunimit me familjarët dhe avokatin e autorit të dyshuar, u bë e mundur që gjatë mbrëmjes së djeshme shtetasi J.H., 28 vjeç, banues në Korçë, të vetëdorëzohet në ambientet e Komisariatit të Policisë Korçë, i shoqëruar nga avokati i tij.

Ky shtetas ishte shpallur në kërkim për veprat penale “Vrasja me paramendim, mbetur në tentativë” dhe “Mbajtja pa leje dhe prodhimi i armëve e municionit”, në lidhje me ngjarjen e ndodhur mbrëmjen e datës 07.09.2019, ku për motive të dobëta, shtetasi J.H.,ka tentuar të vrasë me armë zjarri tip kallashnikov shtetasin I.H., (i cili për pasojë ka mbetur i plagosur) dhe më pas është larguar nga vendi i ngjarjes me një automjet në përdorim të tij.

Gjatë marrjes në pyetje nga Specialistët për Hetimin e Krimeve, shtetasi J.H., ka treguar edhe vendin ku kishte hedhur armën e krimit, e cila iu gjet dhe sekuestrua në cilësinë e provës materiale, së bashku me automjetin tip “BMW”.

Në bashkëpunim me Prokurorinë, vijojnë veprimet e mëtejshme procedurale.

 

Shpërndaje
Share.

Komento