Kishte grumbulluar një sasi të madhe armatimi dhe eksplozivi sa që duket se po përgatitej për luftë, por “tregtarit” durrsak të lajmeve nuk i ka ecur…
Policia i ka hedhur prangat pasi i ka sekuestruar 1 armë zjarri, 19.5 kallëpe tritol, 10 kapsolla detonatore, 20 granata ofensive dhe 20 ndezësa.
Arsenali është kapur në Durrës gjatë një operacioni policor, që solli arrestimin e njeriut që i zotëronte dhe që do t’i shiste kundrejt fitimit.
Bëhet fjalë për shtetasin me inicialet N.K., 47 vjeç, banues në Tiranë, i dënuar më parë për veprën penale “Drejtimi automjeti në mënyrë të parregullt”.
Shërbimet e Policisë, në vendin e quajtur “Mbikalimi i hekurit”, në Sukth, Durrës, kanë ndaluar shtetasin N. K., dhe gjatë kontrollit fizik iu gjetën dhe sekuestruan në cilësinë e provës materiale 16 kallëpe tritol dhe 10 kapsolla detonatore, të cilat ky shtetas do i shiste kundrejt fitimit.
Kontrollet kanë vijuar nga DVP Kukës, në banesën e shtetasit N. K., në Kukës, ku shërbimet e Policisë, gjetën dhe sekuestruan në cilësinë e provës materiale 1 armë zjarri, 3.5 kallëpe tritol, 20 granata ofensive dhe 20 ndezësa.
Në bashkëpunim me Prokurorinë, strukturat hetimore të DVP Durrës po vijojnë punën për zbardhjen e plotë të kësaj veprimtarie kriminale, kapjen dhe arrestimin e personave të tjerë, të përfshirë në këtë veprimtari.
Materialet i kaluan Prokurorisë së Rrethit Gjyqësor Durrës, për veprime të mëtejshme.
/GazetaReforma.com/
