Një operacion policor në Tiranë ka zbuluar një skemë mashtrimi përmes një call center-i të vendosur në një apartament në rrugën “Panorama”.
Si rezultat, një 37-vjeçar është arrestuar, një tjetër është shpallur në kërkim, ndërsa pesë persona po procedohen në gjendje të lirë.
I arrestuari është Ledjan Xhialli, i cili akuzohet si organizatori i kësaj veprimtarie, ndërsa Ronaldo Milo, që kishte marrë me qira apartamentin ku zhvillohej aktiviteti, është shpallur në kërkim.
Hetimet zbuluan se të dyshuarit mashtronin shtetas të huaj, duke i bindur të investonin në bursa fiktive.
Gjatë operacionit të koduar “Location 2”, policia ka sekuestruar pajisje kompjuterike, celularë dhe prova të tjera materiale që lidhen me këtë aktivitet të paligjshëm.
Hetimet vazhdojnë për zbardhjen e plotë të skemës, ndërsa policia është në kërkim të të shpallurit në kërkim.
Materialet hetimore i janë dorëzuar Prokurorisë për veprime të mëtejshme.
Njoftimi i Policisë:
Zbulohet një apartament i përshtatur si call center, ku mashtroheshin shtetas të huaj, përmes telefonit, për të investuar në bursa fiktive.
Vihet në pranga organizatori i kësaj veprimtarie dhe procedohen në gjendje të lirë 5 shtetas të tjerë, të cilët u kapën në flagrancë në apartament, gjatë ndërhyrjes nga Policia.
Shpallet në kërkim 37-vjeçari që e kishte marrë me qira apartamentin, për këtë qëllim.
Sekuestrohen pajisje kompjuterike, celularë dhe prova të tjera materiale.
Si rezultat i hetimeve të kryera gjatë dy muajve, në drejtimin e Prokurorisë, specialistët e Seksionit për Hetimin e Krimeve Ekonomike dhe Financiare, në bashkëpunim me Forcën Operacionale të DVP Tiranë, kanë finalizuar operacionin policor të koduar “Location 2”. Si rezultat i këtij operacioni:
– u arrestua në flagrancë shtetasi L. Xh., 37 vjeç;
– u shpall në kërkim shtetasi R. M., 37 vjeç;
– nisi procedimi penal për shtetasit D. O., 19 vjeç, J. B., 20 vjeç, R. L., 26 vjeç, J. D., 24 vjeçe dhe E. N., 34 vjeçe.
Gjatë operacionit, shërbimet e Policisë kanë ndërhyrë në apartamentin në rrugën “Panorama”, që ishte përshtatur si call center, ku kanë kapur në flagrancë shtetasi L. Xh. dhe 5 operatorë, të cilët mashtronin shtetas të huaj, për të investuar në bursa fiktive.
Nga hetimet rezultoi se apartamenti ishte marrë me qira nga shtetasi R. M., me qëllimin për ta përdorur për këtë veprimtari të kundërligjshme. Vijon puna për kapjen e këtij shtetasi.
Materialet procedurale i kaluan Prokurorisë, për veprime të mëtejshme.
