Anila Aliaj ka bërë të ditur se është përjashtuar nga funksioni i anëtares së kryesisë së Partisë Demokratike, një vendim që, sipas saj, erdhi pas debatit të një dite më parë në mbledhjen e degës Paskuqan-Kamëz. Lajmi është konfirmuar nga vetë Aliaj përmes një reagimi në rrjetet sociale, ku thekson se masa disiplinore është marrë pas qëndrimeve të saj në sallën e mbledhjes.
Ajo tregon se në atë takim, ku ishin të pranishëm rreth 70 burra dhe ajo e vetmja grua si anëtare kryesie, debati u zhvillua në prani të Sekretarit të Përgjithshëm të PD-së, Flamur Noka. Sipas Aliaj, përjashtimi nuk i ka zbehur aspak qëndrimet e saj, ndërsa nënvizon se nga situata ka dalë me dinjitet dhe përkrahje nga qytetarë të shumtë.
“Dhe masa erdhi, përjashtimi nga grupi për njoftim të anëtarëve të kryesisë. Si gjithmonë, unë dola fituese, mora respekt dhe përkrahje nga mijëra qytetarë. Fituese pa figurë, pa pushtet, por vetëm me dinjitet, forcë e zë. Unë fitova respektin dhe mbështetjen; ju fituat mospërfilljen dhe faqen e zezë. Ta thashë në sallë, me 70 burra; e vetmja femër si anëtare kryesie. Vërtet jam femër, por kam burrni shumë më shumë se ju. I paburri nuk është ndryshe, vetëm si ju”, shkruan ajo.
Mbledhja e së mërkurës, 26 nëntor, ku ishte i pranishëm Flamur Noka, u shoqërua me tensione dhe kërkesa për llogaridhënie nga anëtarë të kryesisë së degës, të cilët pretenduan se baza e partisë nuk merret më në konsideratë për vendimmarrjet. Në kulmin e debatit, Aliaj iu drejtua Nokës:
“Nuk jam e punësuar te partia jote. Të jetë prej teje nuk rri asnjë sekond në këtë parti”.
Me përjashtimin e saj, Aliaj thekson se do të vazhdojë të mbajë qëndrimet që shprehu publikisht, ndërsa pretendon se vendimi ndaj saj është pasojë e një kulture politike që nuk pranon debat, sidomos nga zëri i një gruaje brenda strukturave të larta të partisë.
