PD akoma nuk ka vendosur se si do të hyjë në zgjedhje, në koalicion apo e ndarë. Fatmir Mediu, kryetar i Partisë Republikane, në një intervistë televizive, thotë se PD dhe partitë aleate të saj, LZHK e Shehit, PAA e Dukës, PBDNJ e Dules dhe PDK e Ndokës, duke përfshirë dhe PR-në i kanë kërkuar Lulzim Bashës të përcaktojë formulën se si do të dalin për zgjedhje.
Fatmir Mediu tha se këto parti aleate të PD, nuk “e kanë me qejf” një koalicion me LSI-në.
Madje, Mediu tha se ka pasur dhe një takim me zonjën Kryemadhi të LSI. “Dhe ajo nuk e ka përjashtuar mundësinë të dalë vetëm”,- tha Mediu në television.
“Partitë e vogla nuk janë hall i shtuar, por një burim votash, dhe i vetmi element pozitiv që ka opozita në këtë katrahurë është që PD ka aleatë shumë më tepër sesa ka PS. Dhe këta janë elementë pozitivë. Dhe po qe se PD garanton fitoren më vete, është e kotë ta bëjmë këtë diskutim. Ndarja e copëtimi i opozitës që do Edi Rama, do i shërbejë interesave të tij. Nëse ka njerëz të vobektë të PD që thonë parti të vogla, kanë humbur konceptin dhe kanë hallin e vendit të tyre. Duhet parë vendi i shqiptarëve në një qeverisje ndryshe”,- tha Mediu.
Duke përmendur se ka edhe tre ditë kohë nga deklarimi i Lulzim Bashës për të përcaktuar sesi do të dali opozita në zgjedhje, ai tregon edhe variantet.
Ose do të dalin partitë më vete, ose do të ketë një koalicion të PD me partitë (PR, PAA, LZHK e PBDNJ), ose të gjithë me një listë duke përfshirë edhe LSI.
“Të gjitha variantet duhen studiuar”,- shton Mediu në intervistë, duke lënë të kuptohet se nuk ka shumë kohë.
/GazetaReforma.com/
