Detaje të reja janë zbardhur nga ngjarja tronditëse që ndodhi mëngjesin e kësaj të premte në qytetin e Shkodrës, ku një turist amerikan vrau bashkëshorten e tij në apartamentin që kishin marrë me qira.
Ngjarja ndodhi rreth orës 10:15, në rrugën “At Shtjefën Gjeçovi”. Viktima është shtetasja amerikane Sandra Holley Saporito, 53 vjeçe, e cila u godit me thikë disa herë nga bashkëshorti i saj, Brandon Saporito, 57 vjeç.
Pas krimit, autori tentoi të vetëvritej duke prerë damarët, në një gjendje të rënduar psikologjike.
Sipas njoftimit të Policisë së Shkodrës, autori është gjetur në banesë në gjendje të dehur, i gjakosur dhe me plagë në duar. Ai u dërgua menjëherë në spital nën shoqërimin e forcave të rendit dhe stafit mjekësor.
Çifti, me origjinë nga Florida, kishte hyrë në Shqipëri më 27 mars dhe kishte vizituar disa qytete, përfshirë Himarën, Tiranën dhe së fundmi Shkodrën. Në rrjetet sociale ata shfaqeshin si një çift i lumtur dhe në harmoni, duke ndarë momente nga udhëtimi i tyre në vendin tonë.
Hetimet paraprake sugjerojnë se vrasja ka ndodhur pas një konflikti mes çiftit, i përkeqësuar nga gjendja e dehur e autorit. Policia vijon punën për zbardhjen e plotë të rrethanave të krimit
