Nuk mund ta ndalosh makinën askund brenda unazës së vogël të Tiranës. Bashkia ka hequr të gjitha parkimet buzë rrugëve, ndërsa Policia Rrugore e Tiranës është hedhur në aksion dhe gjobit cdo shofer që ndalet në rrugë. Në funksion të planit të veprimit për ndëshkimin e parkimeve të gabuara, përgjatë 12 orëve, policia thotë se ka pasur nën monitorim Rrugën e Kavajës.
Janë vënë 135 gjoba automjeteve të pushuara në kundërshtim me dispozitat e Kodit Rrugor, në një rrugë e cila, siç thotë policia, njësoj si ajo e “Myslym Shyrit”, shërben si arterie kryesore e kryeqytetit.
“Duke qenë se kjo rrugë përshkohet edhe nga disa linja të rëndësishme të transportit publik qytetas, problematika që shkaktohet nga pushimet dhe qëndrimet e gabuara është akoma më e madhe, veçanërisht në afërsi të Poliklinikës Nr. 9 dhe pranë xhamisë, ku pushimet në korsitë e lëvizjes apo në rreshtin e dytë shkaktojnë pengesa serioze për trafikun në tërësi, si dhe për mjetet e emergjencave mjekësore dhe civile në veçanti”,- deklaron policia njoftimin zyrtar.
Në fakt, aksionet e policisë me gjoba masive urdhërohen nga Bashkia e Tiranës që të mbushë arkën me paratë e parkimit me pagesë dhe të justifikohet bllokimi i trafikut nga punimet publike pa plan, njëherësh në të gjithë zonat e kryeqytetit.
/GazetaReforma.com/
