Pandemia e koronavirusit që bllokoi për më shumë se 2 muaj vendin tonë, përveç problemeve në sektorin shëndetësor dhe atë ekonomik, ka krijuar një ngërç të jashtëzakonshëm edhe në sistemin e drejtësisë.
Mbyllja e gjykatave pas shpalljes së gjendjes së fatkeqësisë natyrore nga kryeministri ka krijuar kaos jo vetëm tek qytetarët, por edhe tek ata qe janë pjesë e sistemit të drejtësisë.
Pas këmbënguljes së Dhomës së Avokatisë për rihapjen e gjykatave në muajin prill me argumentin se çështjet mund të gjykoheshin duke respektuar kushtet e mbrojtjes ndaj koronavirusit, Këshilli i Lartë Gjyqësor doli me një deklaratë publike ku njoftohej se prej datës 27 prill, në gjykata do të riniste puna.
“KLGJ vendos rifillimin e veprimtarisë dhe shërbimeve gjyqësore në të gjitha gjykatat e Republikës së Shqipërisë, më datë 27.04.2020. Ngarkohen këshillat dhe kryetarët në detyrë të gjykatave për marrjen e masave për rifillimin e veprimtarisë dhe shërbimeve gjyqësore, në përputhje dhe respektim të masave për kufizimin e përhapjes së COVID-19”, thuhet në vendimin, që hyn në fuqi menjëherë.
Por ndonëse kanë kaluar më shumë se dy javë nga ky vendim, gjykatat vijojnë të jenë të mbyllura.
Burime për “gazetareforma.com” bëjnë me dije në to shqyrtohen vetëm çështjet emergjente dhe jo ato të themelit, çka ka krijuar një bllokim të ngjshëm me atë të Gjykatës së Lartë.
Por teksa në rastin e kësaj të fundit bllokimi vinte si pasojë e mungesës së gjyqtarëve, në rastin e pandemisë duket se vjen prej një vendimi absurd për të paralizuar punën në një kohë që kushtet jane mëse të pranueshme për të rifilluar aktivitetin në siguri të plotë.
Në kuadër të kësaj situate, ka pasur reagime të shumta nga avokatët, të cilëve përveçse u është bllokuar aktiviteti, nuk kanë përfituar as nga paketa e ndihmës ekonomike që qeveria vuri në dispozicion të kategorive të prekura nga izolimi.
Kërkesat e tyre për të aksesuar ndihmën financiare kanë marrë si përgjigje shprehjen “të hanë dhjamin e tyre” edhe pse anëtarët e sistemit gjyqësor paguhen rregullisht, ndërkohë që thirrjet për hapjen e gjykatave kanë rënë në vesh të shurdhër.
Institucionet shtetërore vijojnë të injorojnë ngërçin që ka shkaktuar mbyllja e gjykatave duke treguar paaftësi të pashembullt për të parë në aspektin afatgjatë dëmin që krijon grumbullimi i çështjeve që presin të shqyrtohen.
Sakaq, kjo zvarritje e paarsyeshme përkthehet në një drejtësi të munguar për qytetarët, që prej më shumë se dy muajsh janë privuar nga nga mundësia për të kërkuar drjtësi në sallën e gjyqit, në një kohë kur thuajse çdo institucion tjetër ka rinisur punën.
