Gjyqtari i Fierit Ergys Selamanaj është denoncuar nga zëvendësministri i Mbrojtjes Petro Koçi, njëkohësisht, kryetar i Degës së PS-së në këtë qytet. Gjyqtari i ka dhënë të drejtë një qytetari që kishte paditur kompaninë Albpetrol dhe kërkonte 500 milionë lekë për shlyerje të “dëmit moral”. Koçi akuzon se gjyqtari ka favorizuar një “të fortë”, në dëm të kompanisë publike.
Postimi i plotë
“Këto ditë jam tronditur nga një lajm, sipas të cilit gjyqtari Ergys Selmanaj ka ndëshkuar Kompaninë Albpetrol për të dëmshpërblyer një shtetas me mbiemrin Isufaj me rreth 500 milionë lekë (të vjetra) për shkak “të dëmit moral” që i paskësh shkaktuar kompania këtij shtetasi gjate aktit të ndërprerjes së marrëdhënieve të punës.
Uroj të mos jetë e vërtetë!
Përndryshe i bie që presioni i të fortëve vazhdon të gjunjëzojë gjyqësorin duke shkatërruar financat e një kompanie që ushqen ekonominë tonë dhe qindra familje punonjësish të zonës tonë.
Administrata shtetërore duhet t’i rezistojë këtij presioni që xhvat tenderat e ekonomisë publike dhe në institucione të tjera dhe që u siguron lavanterinë parave të pista të të fortëve.
Ata që s’munden, të bëjnë mënjanë, por jo të firmosin ushqimin e krimit të organizuar me paratë e shtetit.
Nga ana tjetër organet ligjzbatuese duhet të kenë më në vëmendje krimin ekonomik që kryhet nën hundën e tyre.
PS Fier mirëpret çdo hap që korrigjon shpejt këto veprime të shëmtuara të gjyqësorit”, shkruan Petro Koçi.
