Ukraina ka zbuluar detaje të reja mbi një operacion të sofistikuar që është zhvilluar thellë në territorin rus, larg vijës së frontit.
Operacioni, i koduar “Rrjeti i Merimangës”, është realizuar nga Shërbimi i Sigurisë së Ukrainës dhe përfshiu përdorimin e 117 dronëve të drejtuar nga operatorë të trajnuar.
Goditjet u përqendruan në katër aeroporte ushtarake strategjike të Rusisë, ku ishin të pozicionuar bombardues të rëndë si A-50, Tu-95 dhe Tu-22 M3.
Sipas të dhënave paraprake, janë shkatërruar të paktën 13 avionë luftarakë, ndërsa disa të tjerë kanë pësuar dëmtime të mëdha. Dëmi total vlerësohet të kapë shifrën e 7 miliardë dollarëve.
Presidenti Volodymyr Zelensky e cilësoi operacionin si një sukses të pastër, duke theksuar se është zhvilluar ekskluzivisht nga forcat ukrainase.
Ai bëri të ditur gjithashtu se “zyra” e këtij operacioni ndodhej shumë pranë selisë së FSB-së, duke nënvizuar nivelin e lartë të rrezikut dhe profesionalizmit.
Në fund të deklaratës, Zelensky përcolli një mesazh të drejtpërdrejtë, Ukraina do të vazhdojë të mbrohet dhe do të godasë aty ku dhimbja për Rusinë ndihet më shumë, derisa kjo luftë të marrë fund.
