Në Gjirokastër u zhvillua edicioni i katërt i “Qilim Fest”, një ngjarje kulturore që i dha jetë dhe ngjyra pazarit historik të qytetit, duke e kthyer në një skenë të gjallë ku tradita dhe artizanati u përjetuan nga afër.
Në këtë festival, qilimat me motive tradicionale, si zogu i gurit, rombet që evokojnë kalldrëmet apo lulet vendase, nuk ishin thjesht objekte për ekspozim apo shitje, por rrëfime të endura që përcjellin historinë dhe identitetin e zonës.
Pjesa më e veçantë e aktivitetit ishte përfshirja e fëmijëve në punë praktike me lesh, tjerrje dhe endje në tezgjah, duke krijuar miniqilima me ndihmën e mjeshtreve lokale.
“Është një mënyrë e bukur për t’i afruar të vegjlit me trashëgiminë tonë kulturore”, tha artizanja Eli Zhulati, teksa vlerësoi interesin dhe kënaqësinë që shfaqnin fëmijët gjatë punës.
Për shumë prindër, festivali ishte një mënyrë për t’u lidhur me të kaluarën.
“Në këtë kohë teknologjie, është shumë e rëndësishme që fëmijët të prekin me dorë traditën. Kjo përvojë ka vlerë të madhe për qytetin dhe për brezat që rriten,” u shpreh një prej tyre.
Krahas endjes së qilimave, në pazar u prezantuan edhe produkte artizanale dhe ushqimore nga prodhues vendas.
Moza, një zonjë që kultivon dhe përpunon fruta natyrale, solli për vizitorët liko dhe liker të përgatitur vetë, përfshirë edhe një risi këtë vit: likerin e shtogut.
“Ka shumë interes, turistët janë të shumtë dhe kjo është një mundësi për t’u prezantuar”, tha ajo.
Disa artizanë ngritën shqetësimin për konkurrencën nga produktet e fabrikuara jashtë vendit, të cilat qëndronin përkrah punimeve tradicionale, shpesh të trashëguara brez pas brezi.
Pavarësisht kësaj, “Qilim Fest” vijon të shërbejë si një urë mes brezave dhe një mundësi për të rritur ndërgjegjësimin mbi vlerën e zejeve të vjetra shqiptare.
“Synimi ynë është të krijojmë eksperienca që nuk thjesht ekspozojnë, por përfshijnë vizitorin në procesin artizanal. Kemi organizuar disa pika interaktive, përfshirë kënde për fëmijët dhe eksperienca të tjera për turistët drejt kalasë,” tha organizatori Bjori Thana.
“Qilim Fest” tashmë është kthyer në një pikëtakim të rëndësishëm për kulturën, zejet dhe trashëgiminë, duke e bërë Gjirokastrën jo vetëm destinacion turistik, por edhe qendër të gjallë të identitetit kombëtar.
